شمالی وزیرستان میں سیکیورٹی فورسز سے جھڑپوں کے دوران تئیس شدت پسند مارے گئے جبکہ تین جوان زخمی ہوئے۔

عسکری حکام کے مطابق بدھ کی شب دہشت گردوں کے ایک گروپ نے کھجوری چیک پوسٹ سے واپس آنے والے سیکیورٹی فورسز کے قافلے کو نشانہ بنانے کی کوشش کی، جس پردونوں جانب سے فائرنگ کا تبادلہ ہوا، فورسزکی موثر کاروائی میں تئیس شدت پسند مارے گئے جبکہ تین سکیورٹی اہلکار زخمی ہوگئے۔

سکیورٹی فورسز کا قافلہ ان زخمی جوانوں کو واپس لے کر آرہا تھا، جو بدھ کے روز ایک مسجد میں دوران نماز شدت پسندوں کے حملے میں زخمی ہوئے تھے، اس حملے میں اہلکار شہید بھی ہوئے تھے، اطلاعات کے مطابق اردگردکےعلاقوں میں سرچ آپریشن بھی کیا گیا ہے۔

ملک میں جاڑہ اپنے جوبن پر پہنچ گیا ہے، بالائی علاقوں سمیت کئی شہروں میں سردی کی شدت میں اضافہ ہوگیا، جڑواں شہروں، گوجرانوالہ ڈویژن اور کشمیر میں مطلع ابر آلود اور پہاڑوں پر برفباری کا امکان ہے۔

محکمہ موسمیات کے مطابق رواں ہفتے ملک کے بیشتر حصوں میں موسم بدستور سرد اور خشک رہے گا، تاہم جڑواں شہروں، گوجرانوالہ ڈویژن اور کشمیر میں مطلع ابر آلود رہنے کے ساتھ پہاڑی پر برفباری کا امکان ہے۔

ادھر لاہور میں دھند کی شدت میں شدید دھند کے بعد کچھ کمی واقع ہوئی ہے، گلگت بلتستان اور دیامر کے پہاڑی علاقوں میں برفباری کا سلسلہ گزشتہ روز سے وقفے وقفے سے جاری ہے۔

آج ملک میں سب سے کم درجہ حرارت کوئٹہ میں منفی چھ ڈگری سینٹی گریڈ ریکارڈ کیا گیا، کراچی میں تیز ہواؤں کے ساتھ ہی سردی کی شدت میں اضافہ ہو گیا۔

شہریوں نے رات گئے سردی کی شدت سے بچنے کے لئے لکڑیاں جلاکر ہاتھ تاپے اور ٹھنڈ کی شدت سے محفوظ رہنے کیلئے گرم مشروبات، یخنی اور ڈرائی فروٹس کا لطف اٹھایا۔

سپریم کورٹ نے چیئرمین نادرا طارق ملک کی تقرری کے خلاف دائر درخواست مسترد کردی۔

چئیرمین نادرا طارق ملک کی تقرری کے خلاف درخواست کی سماعت چیف جسٹس تصدق حسین جیلانی نے کی، سپریم کورٹ نے آئین کے آرٹیکل ایک سو چوراسی تین کے تحت دائر درخواست مسترد کرتے ہوئے قرار دیا کہ عدالت بنیادی حقوق کے اس آرٹیکل کے دائرہ اختیار سے تجاوز نہیں کرے گی۔

درخواست گزار کاظم رضا ایڈووکیٹ سے مکالمے میں چیف جسٹس نے کہا کہ ایسی درخواستیں اس آرٹیکل کے تحت دائر کرنا آپ کے وقار کے منافی ہے، آپ چاہیں تو اس درخواست کو دوبارہ مناسب طریقے سے دائر کرسکتے ہیں۔

بنگلہ دیش میں عبدالقادر ملا کو پھانسی دیئے جانے کے بعد پاکستان اور بنگلہ دیش کے تعلقات میں کشیدگی بڑھتی جا رہی ہے، دفتر خارجہ نے ڈھاکا میں پاکستانی کمیشن کے باہر احتجاج اور قومی پرچم نذرآتش کیے جانے کی شدید مذمت کی ہے۔

ترجمان دفتر خارجہ نے بنگلہ دیش میں پاکستانی ہائی کمیشن کے باہر احتجاج اور قومی پرچم نذرآتش کرنے کو افسوسسناک قرار دیا ہے، ترجمان نے کہا ہے کہ پاکستان کے سفارتی عملے کی حفاظت بنگلہ دیشی حکومت کی ذمہ داری ہے۔

سیکریٹری خارجہ اعزاز چودھری کے مطابق بنگلہ دیش میں پاکستانی ہائی کمیشن کے باہر مظاہرے کئے گئے، جن میں عبدالقادر ملا کے حوالے سے قرارداد واپس لینے کا مطالبہ کیا گیا، مشیر خارجہ سرتاج عزیز کا کہنا ہے کہ پاکستان کی خارجہ پالیسی خاص کر ہمسایہ ممالک کے معاملات میں عدم مداخلت اور غیر پسندیدہ اصولوں پر وضع کی گئی ہے۔

انھوں نے کہا کہ ملک کی پارلیمان عبدالقادر ملا کی پھانسی کے خلاف قرارداد کا حق رکھتی ہے لیکن خارجہ پالیسی کے تحت یہ بنگلہ دیش کا اندرونی معاملہ ہے، بنگلہ دیش کی وزیراعطم حسینہ واجد کا کہنا ہے کہ پاکستان کا ساتھ دینے والوں کی بنگلادیش میں کوئی جگہ نہیں۔

بنگلادیش کی وزیراعظم حسینہ واجد نے عبدالقادر ملا سے متعلق قرارداد کی مذمت کرتے ہوئے مزید کہا کہ پاکستان نے ثابت کر دیا کہ اس نے بنگلادیش کو دل سے قبول نہیں کیا جبکہ حسنہ واجد یہ بھول گئیں ہیں کہ اب بھی لاکھوں بنگالی پاکستان میں رہتے ہیں اور اپنی زندگی آزادی کے ساتھ گزار رہے ہیں۔