آئی ایم ایف کےمطابق حکومت پاکستان کی جانب سے کی جانےوالی معاشی اصلاحات صحیح سمت پرگامزن ہیں۔

آئی ایم ایف کی جانب سے پاکستان کیلئے پچیپن کروڑ ڈالرقرضے کی دوسری قسط کی منظوری دے دی گئی ہے۔ وزارت خزانہ کے مطابق قرضے کی رقم پاکستان کو جلد مل جائے گی، پاکستان کے لیے قرضے کی منظوری آئی ایم ایف کے بورڈ آف ڈائرکٹرز نے دی۔

آئی ایم ایف بورڈ کے مطابق پاکستانی حکومت کی معاشی اصلاحات صحیح ہیں جب کہ زرمبادلہ ذخائرکا ہدف نہ حاصل ہونے پرپاکستان کوچھوٹ دی گئی ہے۔ یہ قسط پاکستان کی جانب سے لئے گئے چھ اعشاریہ چھ ارب ڈالر کے دوسرے قرض پروگرام کا حصہ ہے

پاکستان کے زرمبادلہ کے ذخائر میں چھیالیس کروڑ ساٹھ لاکھ ڈالرز کا اضافہ ہو گیا ہے۔ مرکزی بینک کے مطابق اس اضافے سے تیرہ دسمبر کو ختم ہونے والے ہفتے تک ملکی زرمبادلہ کے ذخائرکی مجموعی مالیت آٹھ ارب 52 کروڑ63 لاکھ ڈالرہوگئی ہے۔

بینکنگ ذرائع کے مطابق زرمبادلہ کے ذخائر میں اضافہ عالمی اداروں سے قرض اورامداد کی مد میں ملنے والے ڈالرز کے باعث ہوا۔

جبکہ جلد ہی آئی ایم ایف سےقرض کی دوسری قسط 55 کروڑڈالربھی مل جائیں گے، ادھراسٹیٹ بینک نے قرض پر سود اوردرآمدات کیلئے گذشتہ ہفتے زرمبادلہ کے ذخائر سے دس کروڑ ڈالر کی ادائیگی بھی کی ہے۔