جنوبی یمن کے اہم شہر میں پولیس کے ہیڈکوارٹر پر ایک خود کش بمبار سمیت مسلح افراد نے دھاوا بول دیا، جس کے باعث سات افراد زخمی ہوگئے۔
ڈپٹی ڈائریکٹر جنرل پولیس کے مطابق جنوبی یمن میں ایک پولیس کمپاونڈ کی عمارت میں حملہ آوروں نے داخل ہونے کی کوشش کی، جسے وہاں موجود اہلکاروں نے ناکام بنا دیا، جس کے بعد فانرنگ کا تبادلہ ہوا، خود کش حملے سے سات افراد زخمی ہوگئے۔
شام کے وزیراعظم وائل الحلقی کا کہنا ہے کہ شام ایران سیمت تمام دوستانہ ممالک کے ساتھ تعلقات کو مزید وسعت دے گا۔
شامی وزیراعظم وائل الحلقی کا کہنا تھا کہ ایران کے ساتھ تعلقات کو مضبوط کرنے کے ساتھ ساتھ چین، روس، بھارت ،برازیل اور دیگر ممالک کے ساتھ دوستانہ تعلقات چاہتے ہیں۔
شام کے وزیراعظم نے مغربی ممالک کی جانب سے شام پر کیمیائی ہتھیاروں کے استعمال کے خلاف مغربی ممالک کی جانب دباو ڈالنے کی کوششوں ختم کرکے شام کے مسئلے کو سفارتی طریقے سے حل کرنے میں ماسکو اور بیجنگ کے کردارکی تعریف کی۔
پشاور کے نواحی علاقے پھندو میں رکشے میں بم دھماکے کے نتیجے میں تین افراد جاں بحق اور دو زخمی ہوگئے۔
پولیس کے مطابق دھماکا رکشے میں بم کی تنصیب کے دوران ہوا، بم دھماکے میں زخمی ہونے والے 7 افراد کو لیڈی ریڈنگ اسپتال منتقل کردیا گیا، اسپتال انتظامیہ کے مطابق زخمیوں میں تین بچے دو خواتین اور دو مرد شامل ہیں، ایک زخمی کی حالت تشویشناک ہے جبکہ جاں بحق افراد کی لاشیں بھی لیڈی ریڈنگ اسپتال لائی گئی ہیں جن میں سے ایک کی شناخت ہوگئی ہے۔
دھماکے میں ایک گھر کو بھی نقصان پہنچا ہے، دھماکے کے بعد پولیس نے علاقوں کو گھیرے میں لے لیا، دھماکے کے بعد علاقے کی بجلی منقطع ہوگئی، بم ڈسپوزل یونٹ کے مطابق ہلاک ہونے والے افراد آٹھ کلو وزنی بم پشاور کے کسی علاقے میں تخریب کاری کے لیے لے جانا چاہتے تھے، پولیس کے مطابق ہلاک ہونے والوں کا تعلق افغانستان سے ہے، تحقیقات شروع کردی گئی ہیں۔
خیبرپختونخوا کے بلدیاتی انتخابات میں بائیو میٹرک سسٹم متعارف کرانے کےعمل کو حتمی شکل نہیں دی جاسکی، جس کے بعد متعلقہ محکموں کی ایک کمیٹی قائم کردی گئی جوایک ہفتہ میں رپورٹ پیش کرے گی۔
الیکشن کمیشن کے اجلاس کے بعد ڈی جی الیکشن کمیشن شیرافگن نے میڈیا کو بتایا کہ سندھ اور پنجاب میں انتخابی عمل شیڈول کے مطابق جاری رہے گا۔ سندھ حکومت سپریم کورٹ سے رجوع کرتی ہے تو آئندہ کی صورتحال کے مطابق پیش رفت ہوگی۔
شیرافگن کا کہنا تھا کہ بیلٹ پیپرزکی چھپائی کیلئے مہلت کا معاملہ غور وخوض کیلئے کمیشن کے سامنے رکھ دیا گیا ہے تاہم تیرہ جنوری کو بیلٹ پیپرکی چھپائی شروع کردی جائے گی، شیرافگن نے بتایا کہ خیبرپختونخوا لوکل گورنمنٹ ایکٹ کو قبائلی علاقوں تک توسیع دیدی ہے۔
دوہفتوں تک رولز اور حلقہ بندیاں مکمل کرکے تفصیلات پیش کردی جائیں گی، چھاؤنیوں میں بلدیاتی انتخابات سے متعلق لوازمات مکمل کرنے کیلئے کمیشن سے ایک ہفتے کی مہلت طلب کرلی گئی ہے، جب کہ وزارت داخلہ کواسلام آباد میں بلدیاتی انتخابات کے حوالے سے قانون سازی اور دیگر تفصیلات ایک ہفتے میں فراہم کرنے کی ہدایت کی گئی ہے۔
پولیس کے مطابق اسلام آباد کے تھانہ آئی ایٹ ٹو کی حدود میں واقع رہائش گاہ سے پاک فوج کے لیفٹیننٹ حارث عثمان کی پنکھے سے لٹکی ہوئی لاش ملی۔
پولیس کا کہنا ہے بظاہر یہ خود کشی کا واقعہ لگتا ہے تاہم مختلف پہلوؤں سے تحقیقات کی جارہی ہے، اطلاع ملنے پر پاک فوج کے حکام بھی موقع پر پہنچ گئے اور جائے وقوع کا جائزہ لیا۔
پولیس نے لاش کو پوسٹ مارٹم کے لیے پمز اسپتال منتقل کیا۔لاش جس گھر سے ملی وہ لیفٹیننٹ حارث عثمان کا ہی ہے۔
گھوٹکی میں درگاہ جان پور کے قریب ٹریفک حادثےٹریفک حادثے میں پانچ افراد لقمہ اجل بن گئے۔
پولیس کے مطابق گھوٹکی میں درگاہ جان پور کے قریب لنک روڈ پر تیز رفتار لینڈ کروزر بے قابو ہوکر نہر میں جاگری، لینڈ کروزر نہر میں گرنے سے پانچ افراد جاں بحق ہوگئے۔
اطلاعات کے مطابق جاں بحق افراد میں درگاہ جان پور کے پیر بھی شامل ہیں، لاشوں کو نہر سے نکال کر اسپتال منتقل کردیا گیا۔
وفاقی وزیرخزانہ اسحاق ڈار کی زیرصدارت ہونیوالےایکنک کےاجلاس میں دوسواٹھارہ ارب مالیت کے دس منصوبوں کی منظوری دیدی گئی۔
اجلاس کوبتایاگیا کہ رواں سال وزیراعظم پروگرام کے تحت طلبہ میں چارارب روپے مالیت کے ایک لاکھ لیپ ٹاپ تقسیم کئے جائیں گے ۔ اجلاس میں منگلا ڈیم پاور ہاوس کی مرمت و بحالی کے منصوبے کی بھی منظوری دیدی گئی۔ اجلاس میں پن بجلی کے کئی منصوبے بھی منظور کر لئے گئے ہیں ۔
اجلاس میں شرمائی ہائیڈروپراجیکٹ اپردیر کیلئے ایک سوپچاس میگاواٹ،چترال میں شوگو سین کیلئے ایک سوبتیس میگاواٹ،شوشگائی ایک سوچوالس میگاواٹ کے ہائیڈروپاور پراجیکٹس کی اصولی منظوری دی گئی۔
ان منصوبوں پراکانوے ہزارچھ سو بیاسی اعشاریہ چھ ملین روپے لاگت کاتخمینہ آئے گا۔ایکنک کے اجلاس میں کوئٹہ میں فلائی اوورکیلئےایک ارب اورانچاس لاکھ روپے اور شادی کوراسٹوریج ڈیم کی منظوری دی گئی جس پرچھ ہزارپانچ سوبائیس اعشاریہ آٹھ ایک ملین روپے لاگت آئی گی۔
وزیر اطلاعات سندھ شرجیل انعام میمن کاکہناہےعوامی مفاد میں بند کئے گئے کسی بھی غیر قانونی ہائیڈرینٹ کو نہیں کھولا جائے گا۔
شرجیل میمن کا کہنا تھا شہرمیں غیر قانونی پانی کے کنکشنزکے خلاف مہم کا فوری طور پر آغاز کیا جائے اورسات روزمیں غیر قانونی کنکشنز ختم کئے جائیں۔
شرجیل میمن نےٹینکرمالکان کوخبردارکیاہے کہ صنعتوں کا مضر صحت پانی رہائشی علاقوں میں فروخت کرنے کی کوشش کی گئی تو ٹینکرضبط کرلیا جائے گا۔
شرجیل میمن نے بتایا بند کئے گئے ہائیڈرینٹ شفٹنگ کے نام پر غیر قانونی طور پر چل رہے تھے، انہیں کسی صورت نہیں کھولا جائے گا۔
نئےسال کا آغازعوام کیلئےدوخوشخبریوں کےساتھ ہوگا، وزیراعظم کا تیل مصنوعات مہنگی کرنے سےانکار، سخت سردی میں ایل پی جی بیس روپےفی کلوسستی ہوگئی۔
نئے سال پر اس بار ہورہا ہے ماضی سے کچھ ہٹ کر، مہنگائی سے تنگ عوام کو نئےسال پر ملی ہیں دوبڑی خوشخبریاں، پہلی خوشخبری یہ ہے کہ یکم جنوری سے پیٹرولیم مصنوعات کی قیمتوں میں تجویز کیا جانے والا اضافہ اب نہیں ہوگا، وزیر خزانہ اسحاق ڈار کے مطابق جنوری میں پیٹرولیم مصنوعات کی موجودہ قیمتیں برقرار رہیں گی۔
کیونکہ وزیراعظم نواز شریف نے قیمتوں میں اضافے کی سمری مسترد کردی ہے، ادھرپہلی بارسخت سردی کے موسم میں ہوئی ہے ایل پی جی سستی، وہ بھی ایک دو نہیں پورے بیس روپے فی کلو سستی، وجہ ہے انٹرنیشنل مارکیٹ میں ایل پی جی کی قیمتوں کا نیچے آنا اور پاکستان میں ایل پی جی مافیا کی اجارہ داری کا ختم ہونا۔
اس کمی سے پہاڑی اور شمالی علاقوں کو چھوڑ کر ملک بھر میں ایل پی جی کی قیمت آگئی ہے سو روپے فی کلو پر، جبکہ پہاڑی علاقوں میں ایل پی جی دستیاب ہوگی ایک سو پچیس سے 130 روپے فی کلو میں، ایل پی جی ڈسٹری بیوٹرز ایسوسی ایشن کے مطابق نئی قیمتوں کا اطلاق فوری طورسے ہوگا۔
پنجاب کے وزیر بلدیات رانا ثنا اللہ نے کہا ہے کہ پنجاب میں نئی حلقہ بندیوں کے خلاف اعلی عدلیہ کے فیصلے کے بعد تیس جنوری کو بلدیاتی انتخابات کروانا ممکن نہیں رہا۔
پنجاب میں نئی حلقہ بندیوں کے خلاف لاہور ہائیکورٹ کے فیصلے فیصلے کے حوالے سے پنجاب کے وزیر بلدیات رانا ثنا اللہ کہتے ہیں کہ اعلی عدلیہ کے فیصلے کا احترام کرتے ہیں، فیصلے کے خلاف سپریم کورٹ میں اپیل دائر نہیں کریں گے۔
رانا ثنا اللہ کا کہن اتھا کہ اعلی عدلیہ کے فیصلے کے بعد اب تیس جنوری کو صوبے میں بلدیاتی انتخابات کروانا ممکن نہیں رہا۔ بلدیاتی انتخابات دیے گئے شیڈول سے ہٹ کر ہو سکتے ہیں ۔
