بلاول بھٹو زرداری اور عمران خان کی سوشل میڈیا سے نوک جھونک کا سلسلہ جاری ہے، بلاول بھٹو کا کہنا ہے کہ کہ پی ٹی آئی بلاول ہاؤس کی دیوار گرانا چاہتی ہے تاکہ طالبان اسے مار دیں، عمران خان کا کہنا ہے کہ عوامی ملکیت کا استعمال جاگیردارانہ ذہنیت ہے۔

پیپلزپارٹی اور تحریک انصاف کے سربراہوں کی جنگ سوشل میڈیا پر جاری ہے ، بلاول بھٹو زرداری نے ٹویٹر پیغام میں کہا کہ دہشتگردوں کا جو یار ہے غدار ہے، پیپلز پارٹی کے جیالوں نے تحریک طالبان کا سامنا کیا ہے، جینز پہننے والے منی طالبان سے نہیں گھبراتے۔

عمران خان نے بلاول ہاوس کے راستوں کی بندش پر تنقید کرتے ہوئے اسے جاگیردارانہ ذہنیت قراردیا، عمران خان نے استفسار کیا ہے کہ کیا پی ٹی آئی کے پرامن احتجاج پر حملہ جمہوریت ہے، انہوں نے مزید کہا ہے کہ پی ٹی آئی عدالتی احکامات پرعملدرآمد کیلئے احتجاج کررہی ہے۔

پیپلز پارٹی کے رہنما سید اویس مظفر نے کہا ہے کہ پیپلز پارٹی نے ہمیشہ پر امن احتجاج کا راستہ اپنایا ہے، پی ٹی آئی کے احتجاج میں کھلے عام اسلحے کی نمائش کی مذمت کرتے ہیں، سید اویس مظفر نے کہا کہ بلدیاتی انتخابات کے لئے کاغذات نامزدگی فارم جمع کرانے کی آخری تاریخ کے روز پی ٹی آئی کا غیر جمہوری احتجاج سازش ہے۔
    
    
   

وفاقی وزیراطلاعات ونشریات پرویزرشید نے کہا ہے کہ طاہرالقادری مسلمہ طورپرجھوٹ کےسوداگر ہیں۔

   وفاقی وزیراطلاعات کا کہنا تھا کہ دہشت گردی پر بھی کنٹینر بابا خاموش رہتا ہے اور جب سیلاب آتا ہے تو بھی غائب ہوجاتے ہیں۔

انہوں نے کہا کہ قادری جیسوں کو آمریت کا انتظار رہتا ہے ایسا دور اب کبھی نہیں آئے گا، پرویزرشید کا کہنا تھا کہ طاہرالقادری اپنے مقاصد میں پہلے کامیاب ہوئے نہ اب ہوں گے۔
    
    
   

ایم کیو ایم کے رہنما فاروق ستار کا کہنا ہے کہ معاشی استحکام کے لئے مسلم لیگ ن سے روابط ضروری ہے جبکہ خالد مقبول صدیقی کا کہنا ہے کہ ایم کیو ایم نے انتخابات اکیلے لڑے ہیں اور اس بار بھی تنہا لڑے گی۔

ایم کیو ایم کے رہنما فاروق ستار کا کہنا ہے کہ ایم کیو ایم کے دفاتر پر چھاپوں سے انتخابی عمل سبوتاژ ہورہا ہے، ان کا مزید کہنا تھا کہ سندھ کے مفاد کے لیے پیپلزپارٹی سے رسمی،غیر رسمی رابطہ رہتا ہے، متنازع قانون اور حلقہ بندیاں عوام کے ساتھ ناانصافی ہے۔

فاروق ستار نے کہا کہ کراچی آپریشن کے حوالے سے اپوزیشن جماعتوں سے مشورہ کرنا چاہیئے، کراچی آپریشن اہداف حاصل نہ کرسکا تو ناکامی سب کی ہوگی اور اس بات کو یقینی بنایا جائے کہ کوئی ماورائے عدالت قتل نہ ہو۔

انہوں نے کہا کہ پی ٹی آئی اورپیپلز پارٹی کے درمیان مسئلےکا حل نکلنا چاہیے، فاروق ستار نے خواہش کی کہ وزیراعلی ان کو ملاقات کے لئے بلائیں جبکہ خالد مقبول صدیقی کا کہنا ہے کہ ایم کیو ایم جمہوریت پر یقین رکھتی ہے اورحکومت سندھ انتخابی مہم کو مہم ہی رہنے دے گی۔
 

صدر پاکستان ممنون حسین کہتے ہیں کہ حکومت خطے میں پائیدار امن اور ترقی کی خواہاں ہے۔ دہشتگردی کے خلاف پوری قوم متحد ہے، صدر پاکستان ممنون حسین نے سیفما قومی کانفرنس سے خطاب کرتے ہوئے کہا ہے کہ حکومت خطے میں پائیدار امن اور ترقی کی خواہاں ہے، صدر کا کہنا تھا کہ عوام کا معیار زندگی بہتر بنائے بغیر کوئی بھی ملک ترقی نہیں کرسکتا ، صدر ممنون حسین نے کہا کہ ملک کی ترقی میں میڈیا اہم کردار ادا کررہا ہے امید ہے میڈیا نفرتیں ختم کرکے ہم آہنگی کو پھیلانے میں مثبت کردار ادا کرے گا۔ 

ہنگو کے علاقے سروخیل میں بارود سے بھری گاڑی میں دھماکا ہوا جس کے نتیجے ایک شخص جان بحق ہوگیا، ہنگو کے علاقے سروخیل میں ایف آر کرم سے آنے والی بارود سے بھری گاڑی میں زور دار دھماکا ہوا ۔دھماکے سے علاقے میں شدید خوف وہراس پھیل گیا، پولیس حکام کے مطابق دھماکا خود کش تھا اور اس میں ہلاک ہونے والا خود کش بمبار تھا جو بارود سے بھری گاڑی دہشتگردی کے عزائم سے لے کر جارہا تھا۔