وزیر اعلیٰ خیبرپختونخوا علی امین گنڈا پور نے ایک مرتبہ پھر گورنر فیصل کریم کنڈی کو نشانے پر رکھ لیا۔

اے آر وائی نیوز کے مطابق وزیر اعلیٰ کے پی علی امین گنڈا پور نے کہا کہ گورنر اپنی اوقات میں رہے ورنہ سڑک پر پھینک دوں گا۔

انہوں نے کہا کہ فیصل کریم کنڈی سے رشتے داری بھاڑ میں گئی میں کسی چور کو رشتے دار نہیں مانتا۔

علی امین گنڈا پور نے کہا کہ گورنر نے میرے خلاف باتیں بند نہ کیں تو اس کی گاڑی، پیٹرول اور کھانا بند کردوں گا، اپنے چیئرمین سے بھی پوچھو آکسفورڈ میں داخلہ کیسے ملا۔

اس سے قبل وزیر اعلیٰ کا کہنا تھا کہ وفاق نے خیبر پختونخوا کے منصوبے ختم کرکے متعصبانہ رویہ اپنایا، پہلے بجلی منافع اور واجبات روکے ، اب منصوبوں پرضرب لگادی۔

ان کا کہنا تھا کہ واجبات اور منصوبے روک کر سیاسی انتقام لیا جارہا ہے، وفاق کوآخری وارننگ دے رہا ہوں،عوامی مفادات پر کوئی سمجھوتا نہیں کروں گا۔

وزیراعلیٰ کے پی نے مزید کہا تھا کہ خیبر پختونخوا حکومت صوبے کے حقوق سے ہرگز پیچھے نہیں ہٹے گی، وفاق نے متعصبانہ رویہ جاری رکھا تو دمادم مست قلندرہوگا اور وفاق کو بتائیں گے زور سے حقوق کیسے لیے جاتے ہیں۔

پبلک ٹرانسپورٹ میں سفر کرنے والوں کیلیے اچھی خبر ہے کہ اسلام آباد میں الیکٹرک بسیں آج سے پہچنا شروع ہو گئیں۔ 160 میں سے 30 الیکٹرک بسیں پاکستان پہنچ چکی ہیں۔

 الیکٹرک بسیں پاکستان پہنچنے کے بعد شہریوں کو جدید اور معیاری سفری سہولیات فراہم ہوسکیں گی۔ کراچی سے 8 بسیں اسلام آباد، جناح کنونشن سینٹر، چارجنگ پوائنٹ پر پہنچ چکی ہیں۔

22 بسیں کل تک اسلام آباد پہنچ جائیں گی۔ ابتدائی طور پر 30 بسیں دو روٹس پر چلائی جائیں گی۔ ایک روٹ نسٹ، اورنج لائن ڈپو، G-11 تا سے پمز ہسپتال تک ہوگا۔

پہلے روٹ میں بس G-11 مرکز، G-10 مرکز، G-9 مرکز اور G-8 سے ہوتی ہوئی پمز تک پہنچے گی۔ پہلا روٹ 13 سٹاپس پر مشتمل ہوگا اور ہر دس منٹ بعد سٹاپ پر بس پہنچا کرے گی۔

دوسرا روٹ پمز سے شروع ہوکر بری امام تک ہوگا۔ دوسرے روٹ میں یہ سروس G-7، G-6، میلوڈی، آبپارہ، اتاترک روڈ، سرینہ ہوٹل، فارن آفس، ریڈیو پاکستان، ڈپلومیٹک انکلیو سے بری امام تک جائے گی۔

یہ سروس صبح 6 بجے تا رات 10 بجے تک استعمال کی جاسکے گی۔ چیئرمین سی ڈی اے کی ہدایت پر مستحق طبقات بشمول معزور افراد، طلباء و دیگر کو سبسڈی دینے کے لئے بھی طریقہ کار وضع کیا جائے گا۔

کراچی کے علاقے کورنگی میں نجی بینک کے سامنے شہری سے لوٹ مار میں مصروف ڈاکوؤں پر سکیورٹی گارڈ نے فائرنگ کر دی۔

ڈاکو شہری کو لوٹ رہے تھے کہ اس دوران نجی بینک کے سکیورٹی گارڈ نے ان پر فائرنگ کی۔ موقع پر موجود پولیس اہلکاروں اور ڈاکوؤں میں فائرنگ کا تبادلہ ہوا تاہم ملزمان بآسانی فرار ہونے میں کامیاب ہوگئے۔

ایس ایس پی کورنگی حسن سردار خان نے کہا کہ ڈاکو فرار ہوگئے اور پولیس کی نفری موقع پر موجود ہے، پولیس کے جوان ڈاکوؤں کے پیچھے گئے تاہم تلاش جاری ہے۔

بعدازاں ایس ایس پی کورنگی نے نجی بینک کی انتظامیہ سے ملاقات کی۔

حسن سردار خان نے کہا کہ ملزمان نے بینک میں گھسنے کی کوشش ہی نہیں کی، ملزمان سڑک پر موٹر سائیکل سوار شہری کو لوٹ رہے تھے۔

انہوں نے کہا کہ بینک کے باہر موجود سکیورٹی گارڈ نے ملزمان پر فائرنگ کی، سکیورٹی گارڈ کے فوری ایکشن سے ملزمان موقع سے فرار ہوئے۔