کراچی: لیاری آپریشن کے دوران پولیس پر حملہ اور اقدام قتل کیس میں تفتیشی حکام لیاری گینگ وار کے سرغنہ عزیر بلوچ کے خلاف گواہوں کو پیش کرنے میں ناکام رہے۔

انسداد دہشتگردی عدالت میں لیاری آپریشن کے دوران پولیس پر حملہ اور اقدام قتل کیس کی سماعت ہوئی، عدالت نے تفتیشی افسر اور گواہوں کی عدم حاضری پر برہمی کا اظہار کیا۔

عدالت نے تفتیشی افسر کو گواہوں کو پیش کرنے کیلیے آخری موقع دیتے ہوئے حکم دیا کہ آئندہ سماعت پر بنا کسی ناکامی کے گواہوں کو پیش کیا جائے۔

یہ بھی پڑھیں: عزیر بلوچ جیل میں گرمی سے پریشان، ایئر کولر کی فرمائش کردی

عدالت نے آئندہ سماعت پر تفتیشی افسر انسپکٹر جمیل کو بھی طلب کر لیا۔ دوران سماعت لیاری گینگ وار کے سرغنہ عزیر بلوچ اور عبدالعزیز سربازی کو پیش کیا گیا۔

انسداد دہشتگردی عدالت نے کیس کی سماعت 3 جولائی تک ملتوی کر دی۔

2009 کے مقدمے میں بری

واضح رہے کہ جنوی میں عزیر بلوچ کے خلاف پولیس اہلکار سمیت 3 افراد کے قتل کے مقدمے میں ایڈیشنل ڈسٹرکٹ اینڈ سیشن عدالت نے ملزم کو مقدمے سے بری کر دیا تھا۔

عدالت نے چاکیواڑہ تھانے میں 2009 میں درج مقدمے کا فیصلہ سنایا، فاروق حیدر جتوئی ایڈووکیٹ نے عدالت کو بتایا کہ عزیر کا اس مقدمے سے کوئی تعلق نہیں ہے، انہیں گرفتار ملزمان کے بیان پر مقدمے میں شامل کیا گیا تھا۔

وکیل کے مطابق گرفتار دیگر ملزمان پہلے ہی مقدمے سے بری ہو چکے ہیں جبکہ عزیر کو کسی عینی شاہد نے شناخت بھی نہیں کیا تھا۔

واضح رہے کہ اس مقدمے میں گینگ وار ملزم عزیر بلوچ پر پولیس اہلکار سمیت تین افراد کے قتل کا الزام تھا، تاہم شواہد کی عدم موجودگی پر سیشن کورٹ نے انھیں بری کرنے کا حکم جاری کر دیا۔

اس سے قبل عزیر بلوچ کو نیو ٹاؤن تھانے میں درج پولیس اہلکار سمیت 4 افراد کے اغوا اور قتل کے مقدمے سے بری کیا گیا تھا۔

اس مقدمے میں عزیر بلوچ کے ساتھ دیگر ملزمان سکندر، اکبر بلوچ، سرور بلوچ پر الزام تھا کہ انھوں نے پولیس اہلکار لالہ امین، شیر افضل خان، غازی خان کو پکڑ کر عزیر بلوچ کے حوالے کیا، جنھوں نے انہیں قتل کرنے کے بعد میوہ شاہ قبرستان میں دفن کر دیا تھا۔

کراچی : انسداد دہشت گردی کی عدالت نے نقیب اللہ قتل کیس کے اہم گواہ کو آئندہ سماعت پر ہر صورت پیش کرنے کا حکم دے دیا۔

تفصیلات کے مطابق کراچی کی انسداد دہشت گردی کی عدالت میں نقیب اللہ قتل کیس کی سماعت ہوئی، ملزمان سابق ایس ایچ او امان اللہ مروت،شعیب شوٹر،گداحسین،صداقت حسین،ریاض احمد ،راجہ شمیم، محسن عباس کو پیش کیا گیا۔

عدالت نے گواہ ایس ایس پی ڈاکٹر رضوان کو پیش کرنے کے لئے آخری موقع دے دیا ، تفتیشی افسر ڈی ایس پی غلام مرتضیٰ نےایس ایس پی رضوان کی طبیعت خرابی کی رپورٹ جمع کرادی۔

تفتیشی افسر نے بتایا کہ گواہ ایس ایس پی ڈاکٹررضوان کی طبیعت ٹھیک نہیں ہے ، بیماری کے باعث ایس ایس پی رضوان اپنا بیان ریکارڈ کرانے سے قاصر ہیں۔

تفتیشی افسر نے استدعا کی ایس ایس پی ڈاکٹر رضوان کو پیش کرنے کے لئے مہلت دی جائے، جس پر عدالت نے آئندہ سماعت پر گواہ ہر صورت پیش کرنے کا حکم دے دیا۔

مزید پڑھیں : نقیب اللہ قتل کیس کا اہم گواہ اور عینی شاہد اپنے بیان سے منحرف ہوگیا

عدالت نے جیل حکام کو گرفتار تمام ملزمان کو آئندہ سماعت پر پیش کرنے کی ہدایت کرتے ہوئے کیس کی مزید سماعت 3 جولائی تک ملتوی کردی۔

گذشہ سال نقیب اللہ قتل کیس کا اہم گواہ اور عینی شاہد اپنے بیان سے منحرف ہوگیا تھا، گواہ ہیڈ کانسٹیبل راجا جہانگیرنے7ملزمان کوشناخت کرنے سے انکار کردیا، امان اللہ مروت اور شعیب شوٹرسمیت 7 ملزمان کو شناخت کرنے سے انکار کیا تھا۔

گواہ راجاجہانگیر نے بیان میں کہا تھا مجھ سے زبردستی بیان لیا گیا تھا، اعلیٰ حکام کے دباؤ پر پولیس کے تحریری بیان پر دستخط کیےتھے۔

خیال رہے جنوری 2019 کو ایس ایس پی ملیر راؤ انوار کی سربراہی میں پولیس ٹیم نے شاہ لطیف ٹاؤن میں پولیس مقابلہ کا دعویٰ‌ کیا تھا، ٹیم کا مؤقف تھا کہ خطرناک دہشت گردوں کی گرفتاری کے لیے اس کارروائی میں‌ پولیس نے جوابی فائرنگ کرتے ہوئے چار ملزمان کو ہلاک کیا تھا، ہلاک ہونے والوں میں نوجوان نقیب اللہ بھی شامل تھا۔

سوشل میڈیا پر چلنے والی مہم کے بعد اس واقعے کے خلاف عوامی تحریک شروع ہوئی، جس کے نتیجے میں‌ پولیس مقابلے کی تحقیقات شروع ہوئیں، ایس ایس پی رائو انوار کو عہدے سے معطل کرکے مقابلہ کو جعلی قرار دے گیا تھا۔

نقیب قتل کی تفتیش کرنے والی مشترکہ تحقیقاتی کمیٹی نے راؤ انوار کو نقیب اللہ کے ماورائے عدالت قتل کا ذمہ دار ٹھہرا یا گیا تھا، بعد ازاں انسداد دہشت گردی کی عدالت نے مرکزی ملزم اور سابق ایس ایس پی ملیر راؤ انوار کو رہا کردیا تھا۔