لاہور: انسداد دہشتگردی عدالت نے 5 اکتوبر جلاؤ گھیراؤ کے 2 مقدمات میں بانی پاکستان تحریک انصاف (پی ٹی آئی) کی بہنوں علیمہ خانم اور عظمیٰ خان کی عبوری ضمانتوں میں 17 مئی تک توسیع کر دی۔

جج ارشد جاوید کے رخصت پر ہونے کی وجہ سے مقدمات پر سماعت بغیر کارروائی ملتوی کی گئی، علیمہ خانم اور عظمیٰ خان عدالت میں پیش نہیں ہوئیں۔

وکلا نے علیمہ خانم اور عظمیٰ خان کی ایک روزہ حاضری معافی کی درخواست دی اور مؤقف اختیار کیا کہ انہیں اپنے بھائی عمران خان سے ملاقات کرنی ہے۔

بعدازاں، 5 اکتوبر جلاؤ گھیراؤ اور تشدد کے 3 مقدمات پر سماعت ہوئی جس میں سلمان اکرم راجہ اور دیگر ملزمان نے پیش ہو کر حاضری مکمل کروائی۔

عدالت نے سلمان اکرم راجہ اور دیگر کی ضمانتوں میں بھی 17 مئی تک توسیع کی۔

علیمہ خانم، عمران خان اور علی امین گنڈاپور سمیت 200 افراد کے خلاف مقدمہ تھانہ دھمیال میں دہشتگردی اور دیگر دفعات کے تحت مقدمہ درج ہے۔

مقدمے میں سابق صدر مملکت عارف علوی، اسد قیصر، عمر ایوب اور حماد اظہر بھی نامزد ہیں۔ ایف آئی آر مجموعی طور پر 14 دفعات کے تحت درج ہے جس میں کہا گیا کہ ملزمان نے چکری روڈ پر ٹائر جلا کر سڑک بلاک کی اور اشتعال انگیز نعرے بازی کر کے خوف و ہراس پھیلایا۔

ایف آئی آر کے مطابق ملزمان نے پولیس پر پتھراؤ کیا، آتشی اسلحے سے فائرنگ کی اور علیمہ خان نے عمران خان کی طرف سے 24 نومبر کے احتجاج کا پیغام دیا، بشریٰ بی بی کی ایما پر لوگ مشتعل ہوئے، سڑکوں پر نکلے اور ملزمان نے دفعہ 144 کے نفاذ کے باوجود امن و امان میں خلل ڈالا۔

اس سے قبل علیمہ خان کے خلاف انسداد دہشتگردی ایکٹ کے تحت تھانہ ٹیکسلا میں مقدمہ درج کیا گیا تھا، جس میں عارف علوی، علی امین گنڈاپور، شہریار ریاض، حماد اظہر اور اسد قیصر کو نامزد کیا گیا تھا۔

مقدمے میں ڈکیتی، اقدام قتل اور تعزیرات پاکستان کی دیگر دفعات شامل کی گئیں، متن میں لکھا گیا تھا کہ عمران خان نے علیمہ خان کے ذریعے عوام کو 24 نومبر کے احتجاج کا پیغام دیا تھا۔

لاہور: سیکریٹری جنرل پاکستان تحریک انصاف (پی ٹی آئی) سلمان اکرم راجہ نے پارٹی میں اختلافات پر کہا ہے کہ ہماری میٹنگز ہو رہی ہیں جلد معاملات طے پا جائیں گے۔

انسداد دہشتگردی عدالت میں سلمان اکرم راجہ نے میڈیا سے گفتگو میں کہا کہ پی ٹی آئی رہنما بیان بازی نہیں کر رہے بلکہ کچھ اصول اور قاعدے کی باتیں ہیںم ہم آئین اور قانون کی بات کر رہے ہیں شفاف انتخابات چاہتے ہیں۔

سلمان اکرم راجہ نے کہا کہ اعظم سواتی اپنے طور پر بیان دے رہے ہیں میرے علم میں ایسا کچھ نہیں، پارٹی کے طور پر ایسا کچھ نہیں ہو رہا اعظم سواتی اپنی کوشش کر رہے ہیں۔

یہ بھی پڑھیں: شیر افضل مروت اور سلمان اکرم راجہ کے درمیان لفظی جنگ جاری

انہوں نے کہا کہ ہم چاہتے ہیں ملک میں بنیادی حقوق بحال ہوں، کوئی یہ سوچ رہا ہے کہ ہم پتلی گلی سے نکل جائیں گے تو ایسا نہیں۔

ان کا یہ بھی کہنا تھا کہ بانی پی ٹی آئی عمران خان سے اس لیے ملاقاتیں نہیں ہونے دی جا رہی کہ ابہام پیدا ہو۔

دو روز قبل پی ٹی آئی رہنماؤں میں اختلافات مزید کھل کر سامنے آئے تھے جبکہ سلمان اکرم راجہ نے عمران خان سے ملاقات کرنے والوں پر لفظی گولہ باری کی تھی۔

سلمان اکرم راجہ نے اپنے بیان میں کہا تھا کہ عمران خان سے جیل میں ملاقات کیلیے میں نے 6 وکیلوں کی فہرست دی تھی لیکن ان میں سے 5 کے نام نکال دیے گئے اور جو پانچ لوگ دندناتے ہوئے گئے ان کا فہرست میں نام نہیں تھا۔

اس پر بیرسٹر علی ظفر نے ردعمل میں کہا تھا کہ بانی پی ٹی آئی سے ملنا ہر ایک کا حق ہے سلمان اکرم راجہ نے نیا تنازع کھڑا کیا۔

چیئرمین پی ٹی آئی بیرسٹر گوہر نے بھی ان کو جواب دیتے ہوئے کہا تھا کہ بانی پی ٹی آئی کے بعد صرف میرا آرڈر چلتا ہے، میں کسی کو وضاحت نہیں دوں گا، میں چیئرمین ہوں پوری پارٹی مجھے وضاحت دے گی، میں صرف عمران خان کو جواب دہ ہوں۔

بیرسٹر گوہر کا کہنا تھا کہ میرے دستخط سے پارٹی میں لوگوں کو ٹکٹس ملتے ہیں، میں عمران خان کے اعتماد کو کبھی ٹھیس نہیں پہنچاؤں گا، یہ جان خدا کے بعد بانی پی ٹی آئی کی امانت ہے۔