ممبئی: مشہور بھارتی مزاحیہ ڈرامہ سیریل ’تارک مہتا کا الٹا چشمہ‘ میں دیشا وکانی کے بعد ’دیابین‘ کے کردار کیلیے نئی اداکارہ مل گئی۔

انڈین میڈیا کی رپورٹس کے مطابق دیابین سالوں سے ’تارک مہتا کا الٹا چشمہ‘ سے غائب ہیں۔ شو میں مشہور کردار ادا کرنے والی دیشا وکانی 2018 میں زچگی کی چھٹی پر گئی تھیں اور تب سے واپس نہیں آئیں۔

چند ماہ قبل شو کے پروڈیوسر اسیت مودی نے تصدیق کی تھی کہ دیشا وکالی سیٹ پر واپس نہیں آئیں گی۔ تایم اب معلوم ہوا ہے کہ ان کی جگہ نئی اداکارہ کی تلاش ختم کر دی گئی۔

یہ بھی پڑھیں: ٹپو اور سونو کی شادی، صارفین کا دلچسپ ردعمل

اسیت مودی دیابین کے کردار کیلیے آڈیشن لے رہے تھے جس میں انہیں ایک اداکارہ پسند آئی ہے جس کی شناخت ظاہر نہیں کی جا رہی البتہ ٹیم نے اس کے ساتھ فرضی شوٹ شروع کر دیا۔

ذرائع نے بتایا کہ یہ سچ ہے، اسیت مودی ایک نئی دیابین کی تلاش میں تھے اور حال ہی میں ایک آڈیشن نے انہیں بہت متاثر کیا، اداکارہ کے ساتھ فرضی شوٹس جاری ہیں، تقریباً ایک ہفتہ ہوگیا وہ یہاں ہمارے ساتھ شوٹنگ کر رہی ہیں۔

جنوری میں اسیت مودی نے ایک انٹرویو میں اس بات کی تصدیق کی تھی کہ دیشا وکانی شو میں واپس نہیں آئیں گی، وہ اس وقت اپنے دونوں بچوں کے ساتھ مصروف ہیں۔

ڈرامہ سیریل ’تارک مہتا کا الٹا چشمہ‘ 16 سال سے کامیابی سے جاری ہے، شو کو کافی پسند کیا جا رہا ہے اور اس کی ٹی آر پی بھی اپنی جگہ برقرار ہے۔

آنند بخشی نے بولی وڈ کے لیے سدا بہار نغمات تخلیق کیے اور لگ بھگ چار دہائیوں تک شائقین کو اپنی فلمی شاعری کا دیوانہ بنائے رکھا۔ آنند بخشی 30 مارچ 2002ء کو ممبئی میں وفات پاگئے تھے۔

نغمہ نگار آنند بخشی 21 جولائی 1930 کو راول پنڈی میں‌ پیدا ہوئے تھے جو آج پاکستان کا حصّہ ہے۔ آنند بخشی جیسا حساس طبع اور شاعر اپنے آبائی علاقہ کو کبھی فراموش نہیں کرسکا اور ہمیشہ روال پنڈی اور اپنے احباب کی یاد ان کے دل میں زندہ رہی۔ آنند بخشی کو بچپن میں پیار سے نندو کہہ کر بلایا جاتا تھا۔ ان کا نام آنند پرکاش تھا۔ لیکن فلمی دنیا میں آنند بخشی کے نام سے پہچانے گئے۔

آنند بخشی گلوکاری کا شوق رکھتے تھے اور فلمی دنیا میں بطور گلوکار ہی اپنی شناخت بنانا چاہتے تھے۔ مگر قسمت دیکھیے کہ انھیں فلمی دنیا میں گیت نگار کی حیثیت سے شہرت اور مقبولیت ملی۔ آنند بخشی اپنے خواب کو پورا کرنے کے لیے 14 سال کی عمر میں گھر چھوڑ کر ممبئی آ گئے جہاں رائل انڈين نیوی میں دو سال تک کام کیا۔ لیکن ایک تنازع کی وجہ سے یہ نوکری چھوڑنی پڑی۔ تقسیم ہند کے بعد چند برس بھارتی فوج میں بھی ملازمت کی مگر پھر ان کی ملاقات مشہور اداکار بھگوان دادا سے ہوئی جنھوں‌ نے اپنی ایک فلم ’’بھلا آدمی‘‘ کے لیے آنند بخشی سے گیت لکھوائے اور یوں ان کے فلمی کیریئر آغاز ہو گیا۔ ابتدائی سات برس تک انھیں‌ بطور گیت نگار کوئی خاص کام یابی نہیں مل سکی مگر 1965 میں فلم ’’ جب جب پھول کھلے‘‘ ریلیز ہوئی تو اس کے لیے آنند بخشی کے لکھے ہوئے گیت’’پردیسیوں سے نہ انكھياں ملانا، یہ سماں سماں ہے یہ پیار کا، ایک تھا گل اور ایک تھی بلبل‘‘ سپر ہٹ ثابت ہوئے۔ اسی سال فلم ’’ہمالیہ کی گود میں‘‘ ریلیز ہوئی اور اس کا ایک گیت ’’چاند سی محبوبہ ہو میری کب ایسا میں نے سوچا تھا‘‘.. بھی بہت مقبول ہوا۔ اب آنند بخشی کو شناخت مل چکی تھی اور سال 1967 میں سنیل دت اور نوتن کی فلم ’’ملن‘‘ کے نغمات نے تو ہر طرف دھوم مچا دی۔ ’’ساون کا مہینہ پون کرے شور، یگ یگ تک ہم گیت ملن کے گاتے رہیں گے، رام کرے ایسا ہو جائے‘‘ جیسے سدا بہار نغمات نے بطور نغمہ نگار آنند بخشی کو شہرت کی نئی بلندیوں پر پہنچا دیا۔

آنند بخشی کے فلمی گیتوں نے اپنے وقت کے سپراسٹار راجیش کھنہ کو بھی لازوال شہرت دی تھی۔ انھوں نے فلم ’’آرادھنا‘‘ کے لیے گیت ’’میرے سپنوں کی رانی کب آئے گی تو‘‘ لکھا اور یہ راجیش کھنہ پر فلمایا‌ گیا جو آج بھی اپنی شاعری اور موسیقی کی وجہ سے بہت شوق سے سنا جاتا ہے۔

گیت نگار آنند بخشی کو لگ بھگ 40 مرتبہ فلم فیئر ایوارڈ کے لیے نام زد کیا گیا اور چار مرتبہ وہ اس ایوارڈ کے حق دار قرار پائے۔ بخشی صاحب نے بطور گلوکار اپنا شوق پورا کرنے کے لیے ستر کی دہائی میں فلم موم کی گڑیا میں ’’میں ڈھونڈ رہا تھا سپنوں میں‘‘ اور ’’باغوں میں بہار آئی‘‘ جیسے گیت گائے تھے، جو کافی مقبول ہوئے۔

نغمہ نگار آنند بخشی کو آخری فلم فیئر ایوارڈ 1999 میں سبھاش گھئی کی فلم تال کے گیت ’عشق بنا کیا جینا یارا‘ پر دیا گیا تھا۔

ممبئی: بالی وڈ اداکارہ امریتا اروڑا نے شوہر شکیل لڈک، فلم اسٹار سیف علی خان اور دوست بلال امروہی کے خلاف جاری کیس میں بطور گواہ گواہی دے دی۔

انڈین میڈیا کی رپورٹس کے مطابق کیس فائیو اسٹار ہوٹل میں 2012 میں ہونے والے جھگڑے سے متعلق ہے جس میں بزنس مین اقبال شرما نے سیف علی خان سمیت تینوں پر الزام عائد کیا کہ انہوں نے مجھے اور میرے بہنوئی رمن پٹیل کو تشدد کا نشانہ بنایا۔

امریتا اروڑا نے عدالت میں اُس رات پیش آئے واقعے کی تفصیل بتاتے ہوئے کہا کہ یہ واقعہ اُس وقت پیش آیا جب ایک نامعلوم شخص نے جارحانہ انداز میں ان کے گروپ سے بدتمیزی کی۔

یہ بھی پڑھیں: سیف علی خان کی ’ریس 4‘ میں راکول پریت کی انٹری؟

اداکارہ نے کہا کہ ہم نے بہت تیز اور جارحانہ آواز میں کسی کو ہمارے انکلوژر میں گھستے ہوئے دیکھا، اس نے ہمیں کہا کہ خاموش رہو، ہم سب حیران رہ گئے کہ یہ کیا ہو رہا ہے، سیف علی خان صورتحال کو کنٹرول کرنے کیلیے اٹھے اور اس وقت جھگڑا شروع ہوگیا، اقبال شرما نے اداکار اور ان کے دوستوں پر جارحانہ سلوک اور بدسلوکی کا الزام لگایا۔

اقبال شرما نے الزام لگایا کہ اداکار نے اسے گھونسا مار کر ناک توڑ دی اور اس کے بہنوئی رمن پٹیل پر بھی تشدد کیا۔ بزنس مین نے واقعے کے فوراً بعد پولیس میں شکایت درج کرائی جس کے نتیجے میں سیف علی خان اور ان کے ساتھیوں کے خلاف حملہ اور مجرمانہ دھمکیاں دینے کے الزامات لگائے گئے۔

تاہم، سیف علی خان نے مسلسل کہا کہ انہوں نے اپنے دفاع میں قدم اٹھایا۔ ان کے مطابق جھگڑا اُس وقت بڑھ گیا جب اقبال شرما نے مبینہ طور پر گروپ کی خواتین کے بارے میں تضحیک آمیز تبصرے کیے جن میں کرینہ کپور خان، ملائکہ اروڑا اور امریتا اروڑا شامل تھیں۔

فلم اسٹار نے دعویٰ کیا کہ اقبال شرما کے تبصرے نامناسب تھے اور اس نے ان کے دفاع میں جواب دیا۔

یہ مقدمہ ایک دہائی سے زائد عرصے سے جاری ہے جس کی عدالت میں متعدد سماعتیں ہو چکی ہیں۔ امریتا اروڑا کی گواہی سیف علی خان کے بیان کی تائید کرتی ہے کہ صورتحال اقبال شرما کے جارحانہ انداز سے شروع ہوئی۔

عدالت حتمی فیصلے پر پہنچنے سے پہلے گواہوں کے بیانات کا جائزہ لے گی۔