دارالحکومت اسلام آباد میں افسوسناک حادثہ پیش آیا جہاں تیز رفتار ڈمپر نے 5 گاڑیوں کو ٹکر مار کر 3 شہریوں کی جان لے لی۔

حادثے میں 7 افراد زخمی بھی ہوئے جنہیں پولیس نے پمز اسپتال منتقل کر دیا۔ 5 گاڑیوں کو ٹکر اور شہریوں کو کچلنے کے فوراً بعد ڈمپر کا ڈرائیور موقع سے فرار ہوگیا۔

گزشتہ روز فیصل آباد بائی پاس روڈ پر تیز رفتار ڈمپر نے موٹرسائیکل کو ٹکر ماری تھی جس کے نتیجے میں 2 کم عمر بچیاں جاں بحق ہوگئی تھیں۔

یہ بھی پڑھیں: چند گھنٹوں میں تیز رفتار ڈمپروں نے 2 موٹر سائیکل سواروں کو کچل ڈالا

9 سالہ ارم اور 8 سالہ کرن موقع پر ہی دم توڑ گئی تھیں جبکہ موٹرسائیکل کو ٹکر مارنے کے بعد ڈمپر ڈرائیور فرار ہوگیا تھا۔ پولیس کا کہنا تھا کہ فرار ڈرائیور کی تلاش جاری ہے جلد ہی گرفتار کر کے کارروائی عمل میں لائی جائے گی۔

اس سے ایک روز قبل لاڑکانہ میں ایک ہی ڈمپر نے 5 روز میں 4 افراد کو کچل کر مار ڈالا۔ سندھ سالڈویسٹ مینجمنٹ کے ڈمپر نے ایئرپورٹ روڈ پر ایک اور خاتون کو کچلا۔

ڈمپر کی ٹکر سے قطب کالونی کی رہائشی خاتون موقع پر جاں بحق ہوگئی تھیں، 4 روز قبل اسی ڈمپر کے کچلے جانے سے ماں، بیٹا، بیٹی جاں بحق جبکہ والد زخمی ہوا تھا۔

اس نے عید شاپنگ کیلیے مارکیٹ آنے والی فیملی کو کچل دیا تھا، پہلے حادثے کے بعد لائسنس بنوا کر ڈمپر کا ڈرائیور تبدیل کر دیا گیا تھا۔

اسلام آباد: وزیر اعظم کے مشیر برائے سیاسی امور رانا ثنا اللہ کا کہنا ہے کہ سوشل میڈیا کو ریگولیٹ کرنے کیلیے قانون سازی ہو رہی ہے۔

اے آر وائی نیوز سے خصوصی گفتگو میں رانا ثنا اللہ نے کہا کہ دہشتگرد کسی بھی معاملے کو جواز بنا کر دہشتگردی کرنے پر وضاحت نہیں دے سکتا، دہشتگردی کے خلاف قومی اور مقامی سطح پر اپنے مؤقف میں شفافیت لانا ہوگی۔

رانا ثنا اللہ نے کہا کہ بلوچستان میں گورننس کا کوئی مسئلہ ہے تو اسے حل کرنا ہم سب کی ذمہ داری ہے، دہشتگرد یہ مؤقف اپنا نہیں سکتے کہ بلوچستان میں احساس محرومی ہے۔

یہ بھی پڑھیں: سوشل میڈیا کو ریگولیٹ کرنے کیلئے پیکا ایکٹ 2016 میں ترمیم کی منظوری

انہوں نے کہا کہ سوشل میڈیا کو دہشتگردوں نے ہتھیار بنایا ہوا ہے، سوشل میڈیا پر پروپیگنڈے پر قانون کا سہارا لیا جا سکتا ہے، تفتیشی ادارے سوشل میڈیا کے غلط استعمال کے خلاف معاملے کو ریگولیٹ کر سکتی ہیں، دہشتگردی اور ریاست مخالف بیانیے پر کارروائی ہو رہی ہے۔

ان کا کہنا تھا کہ گرینڈ آپریشن میں ایسا کیا ہوگا جو اب نہیں ہو رہا؟ جعفر ایکسپریس پر حملے کے بعد ہمارے جوانوں نے مہارت کے ساتھ آپریشن مکمل کیا، ہمارے جوان اور فوجی افسران فرنٹ لائن پر دہشتگردوں سے لڑتے اور جان کا نذرانہ دیتے ہیں، کسی بھی دہشتگرد سے متعلق اطلاع پر فورسز فوری آپریشن کرتی ہیں۔

مئی 2024 میں وفاقی حکومت نے سوشل میڈیا ریگولیٹری اتھارٹی کے قیام کیلیے میڈیا ہاؤسز اور دیگر اسٹیک ہولڈرز کو مشاورت کی دعوت دی تھی۔

ذرائع نے بتایا تھا کہ حکومت نے سوشل میڈیا ریگولیٹری اتھارٹی کے قیام کیلیے مشاورت کا آغاز کر دیا، اتھارٹی سے متعلق تجویز شدہ پیکا ترمیمی بل 2024 ایوان میں پیش کیا جانا ہے، مجوزہ ترمیمی بل اور ڈیجیٹل رائٹس پروٹیکشن اتھارٹی کے قیام کیلیے مشاورت کی جائے گی۔

ذرائع کا کہنا تھا کہ وزیر اعظم کابینہ میں معاملے پر کمیٹی تشکیل دے چکے جس کا کام مشاورت کرنا ہوگا، اتھارٹی کا مقصد ڈیجیٹل حقوق سے متعلق معاملات پر حکومت کو تجاویز دینا ہے اور انٹرنیٹ کے ذمہ دارانہ استعمال اور ضوابط کی تعمیل کو یقینی بنانا ہے۔

اسلام آباد: ترجمان جمعیت علمائے اسلام (ف) اسلم غوری نے وزیر اعلیٰ خیبر پختونخوا علی امین گنڈاپور کو پاکستان تحریک انصاف (پی ٹی آئی) کا گوربا چوف (سابق سوویت یونین کے پہلے اور آخری صدر) قرار دے دیا۔

اسلم غوری نے اپنے ردعمل میں کہا کہ علی امین گنڈاپور پی ٹی آئی کے گوربا چوف ہیں، وہ عمران خان کی ہدایات کے باوجود فضل الرحمان کے خلاف ہرزہ سرائی کر رہے ہیں۔

یہ بھی پڑھیں: خیبر پختونخوا میں آپریشن کی اجازت نہیں دیں گے، علی امین گنڈاپور

انہوں نے الزام لگایا کہ وہ پی ٹی آئی اور جے یو آئی (ف) میں فاصلے بڑھانے کی سازش کر رہے ہیں، گرینڈ اپوزیشن میں رکاوٹ سے حکومت اور دیگر کو فائدہ ہوگا، پی ٹی آئی کو بیرونی نہیں اندرونی سازشوں سے خطرہ ہے۔

ترجمان کا کہنا تھا کہ اپوزیشن اتحاد جب بننے کے قریب ہوتا ہے تو سازشی عناصر اپنا کام شروع کر دیتے ہیں۔

اسلم غوری نے مزید کہا کہ وزیر اعلیٰ کے پی اپنی حکومت کو دوام دینے کیلیے اپوزیشن اتحاد سے خوفزدہ ہیں، پی ٹی آئی قیادت پارٹی کے اندر سازشیوں پر نظر رکھے، اپوزیشن گرینڈ الائنس کو ہماری کمزوری نہ سمجھا جائے۔

ان کا کہنا تھا کہ انہوں نے علما کی تضحیک کر کے اپنی ذہنیت کا اظہار کیا ہے، پی ٹی آئی وضاحت کرے کہ کیا علی امین گنڈاپور کا علما کے بارے میں بیان ان کی پارٹی پالیسی ہے؟

کے الیکٹرک کے صنعتی صارفین نے وزیر اعظم پاکستان کی جانب سے اعلان کردہ سردیوں میں بجلی کی طلب بڑھانے کے اقدامات سے بھر پور استفادہ کیا۔ دسمبر 2024 سے فروری 2025 کے تین ماہ میں جاری رہنے والے اس پیکج صارفین کو اضافی بجلی کے استعمال پر رعایت دی گئی تھی ۔

سردیوں کے موسم میں جب بجلی کی طلب کم ہو جاتی ہے تو اس طلب کو بڑھانے کے لئے خصوصی پیکج ڈیزائن کیا گیا۔ اس پیکج کو صنعتوں کی جانب سے موثر انداز میں استعمال کیا۔

ونٹر پیکیج کے دورانیہ میں کے-الیکٹرک نیٹورک پر موجود انڈسٹریل صارفین کے انکریمینٹل یونٹس، ٹوٹل استعمال شدہ یونٹس کے قریبا” 6 فیصد سے 7 فیصد تک رہے۔

 یہ اضافہ کے الیکٹرک کے اس عزم کا اعادہ ہے کہ وہ کراچی کی صنعتوں کو بجلی کی فراہمی کے زریعے  ترقی کی جانب لے جارہا ہے۔ وزیر اعظم شہباز شریف کی توجہ بھی ملک میں صنعتی سرگرمیوں کو بڑھانے پر مرکوز ہے۔

کے الیکٹرک کے شعبہ ابلاغیات کے سربراہ عمران رانا نے ونٹر پیکج پر تبصرہ کرتے ہوئے کہا کہ وزیر اعظم کا بجلی کی سہولت کا پیکج کے تحت  کراچی میں 10 کروڑ یونٹ زائد  بجلی اضافی استعمال ہوئی ہے۔ اور آف پیک سیزن میں صارفین کو سستی بجلی کا فایدہ پہنچایا ہے۔

عمران رانا کا مذید کہنا تھا کہ کے الیکٹرک کی جانب سے صنعتوں کی بجلی کی فراہمی پر خصوصی توجہ دی جاتی ہے۔ جس سے شہر میں صنعتوں میں بہتری اور استحکام آرہا ہے۔ اور یہ  اس بات کو بھی ظاہر کرتا ہے کہ اس قسم کے بہ ہدف پیکجز سے بہتر فوائد حاصل کیئے جاسکتے ہیں۔ ہم اس قسم کے پیکجز کی حوصلہ افزائی کرتے رہیں گے۔