کراچی : مصطفیٰ عامر قتل کیس کے مرکزی ملزم ارمغان کے منی لانڈرنگ میں ملوث ہونے سے متعلق تحقیقات شروع کردی گئیں۔
تفصیلات کے مطابق مصطفیٰ عامر قتل کیس میں وفاقی تحقیقاتی ادارے (ایف آئی اے) نے ارمغان کے منی لانڈرنگ میں ملوث ہونے سے متعلق تحقیقات شروع کردی۔
اینٹی منی لانڈرنگ سرکل اورسائبر کرائم سرکل مشترکہ تفتیش کررہے ہیں، حکام نے بتایا کہ ارمغان کے تمام اکاؤنٹس اور پراپرٹیز کو 90 روز کیلئے منجمد کر رہے ہیں۔
ایف آئی اے حکام کا کہنا تھا کہ ارمغان نے اکاؤنٹس سےجن افراد کیساتھ ڈیلنگ کی انہیں بھی شامل تفتیش کیا جائے گا۔
منی لانڈرنگ میں ملوث ہونے کے حوالے سے شواہد دینے کیلئے سی آئی اے کو خط لکھ دیا ہے، ملزم کے سائبرکرائم میں ملوث ہونے کے حوالے سے شواہد کا فرانزک کروائیں گے۔
یاد رہے گذشتہ روز قومی اسمبلی کی قائمہ کمیٹی برائے داخلہ نے مصطفی عامر قتل کیس میں ایف آئی اے سائبر کرائم کو تحقیقات کرنے کا حکم دیا تھا۔
بعد ازاں ماہر ایف آئی اے افسران پر مشتمل 3 رکنی کمیٹی تشکیل دے دی گئی تھی، ڈپٹی ڈائریکٹر فرانزک اسلم منظور کمیٹی کی سربراہی کریں گے جبکہ
اسسٹنٹ ڈائریکٹر فرانزک عامرزیب ٹیم میں بطور ممبر شامل ہوں گے جب کہ سب انسپکٹر شعیب شہاب بھی بطور ممبر تحقیقاتی ٹیم میں شامل ہیں۔
حیدرآباد : وزیر توانائی ناصر حسین شاہ نے 150 سے 200 یونٹ استعمال کرنے والے صارفین کو خوشخبری سنادی۔
تفصیلات کے مطابق سندھ سولرا نرجی پروجیکٹ کی جانب سے سولر سسٹم تقسیم کرنے کی تقریب کا انعقاد کیا گیا۔
اس موقع پر وزیر توانائی ناصر حسین شاہ نے کہا کہ سندھ حکومت اور ورلڈ بینک کے تعاون سے 2 لاکھ سولر سسٹم تقسیم کیے جا رہے ہیں، ورلڈ بینک کی کنڈیشن تھی بینفشری کا کچھ نہ کچھ تعاون ہونا چاہیے۔
صوبائی وزیر کا کہنا تھا کہ 2 سال پہلے اس پروگرام میں 40 اور 60 کا ریشو تھا، سندھ میں 1 لاکھ 62 ہزار600 سے زائدا نتہائی غریب خاندان ہیں جبکہ کوہستان، ریگستان اور کچے کے علاقوں میں بھی سولرسسٹم فراہم کیے جائیں گے۔
انھوں نے بتایا کہ بلاول بھٹو کے حکم پر سولر اور ہائبرڈ پارکس بنائے جا رہے ہیں، سولر اور ہائبرڈ پارکس سے جتنی بجلی پیدا ہوگی، نیشنل گرڈ میں بھی دی جائے گی، اس سسٹم سے پیدا بجلی سے 150 سے 200 یونٹ تک والوں کومفت بجلی ملے گی۔
وزیرتوانائی نے کہا کہ بلاول بھٹو کے حکم پر قرضوں کا پروگرام بھی لایا جا رہا ہے، مختلف بینکوں سے قرضہ دلوایا جائے گا، سود سندھ حکومت ادا کرے گی۔
ان کا کہنا تھا کہ پی پی کی حکومت 21 لاکھ گھر بنا کر دے رہی ہے، سیلاب متاثرین کو گھر صرف سندھ حکومت بنا کر دے رہی ہے۔
چین کے جنوبی حصے میں واقعہ ایک ندی میں بڑا حادثہ رونما ہوا، تیل رساؤ کو صاف کرنے والا بحری جہاز کشتی سے ٹکرا گیا، جس کے نتیجے میں 11 افراد موت کے منہ میں چلے گئے جبکہ 5 افراد لاپتہ ہوگئے۔
رپورٹس کے مطابق حادثہ منگل کی صبح چین کے حنان صوبے میں پیش آیا۔ جہاں یوان شوئی ندی میں ایک بحری جہاز نے ایک چھوٹی کشتی کو زوردار ٹکر مار دی۔ جس سے کشتی میں موجود تمام 19 افراد پانی میں گرگئے۔
بروقت کارروائی کرتے ہوئے 3 افراد کو بچالیا گیا مگر 11 افراد کی زندگی نہیں بچ پائی، جبکہ پانچ افراد تاحال لاپتہ ہیں‘ جن کی تلاش جاری ہے۔
حادثے میں بچ جانے والے ایک شخص کے رشتے دار کا کہنا تھا کہ کشتی ان کے گاؤں میں آنے جانے کا واحد ذریعہ تھی، ویڈیو میں دیکھا جاسکتا ہے کہ تیل رساؤ کو صاف کرنے والا بڑا جہاز کشتی کو ہٹ کررہا ہے۔
اس سے قبل بھارت میں ممبئی کے علی باغ کے قریب سمندر میں ایک کشتی میں اچانک خوفناک آگ بھڑک اُٹھی، جس کی ویڈیو بھی سوشل میڈیا پر گردش کررہی ہے۔
بھارتی میڈیا رپورٹس کے مطابق کشتی میں آگ لگنے کا واقعہ صبح کے وقت پیش آیا، اس دوران کشتی کا تقریباً 80 فیصد حصہ جل کر خاکستر ہوگیا۔ آگ کی لپیٹ میں آکر کشتی میں موجود مچھلی پکڑنے کے جال بھی جل کر راکھ ہوگئے۔
رپورٹس کے مطابق کشتی پر 18 سے 20 ماہی گیر سوار تھے، تاہم خوش قسمتی کوئی جانی نقصان نہیں ہوا، آگ لگنے کی اصل وجہ تاحال معلوم نہیں ہوسکی، لیکن ابتدائی معلومات کے مطابق آگ ممکنہ طور پر شارٹ سرکٹ کے سبب لگی، کشتی ساکھر گاؤں کے رہائشی راکیش ماروتی گن کی بتائی جا رہی ہے۔
کشتی کو مقامی لوگوں کی مدد سے کنارے تک پہنچایا گیا اور آگ کو بجھایا گیا، سوشل میڈیا پر وائرل ہونے والی ویڈیو میں دیکھا جا سکتا ہے کہ سمندر کے بیچ میں یہ شپ آگ کے شعلوں میں گھر گئی تھی، آگ کی شدت بہت زیادہ تھی، جس کے باعث آگ بجھانے میں مشکلات کا سامنا کرنا پڑا۔
پولیس کا اس حوالے سے کہنا ہے کہ علی باغ کے ساحل سے تقریباً 6 سے 7 سمندری میل دور راکیش گن نامی ماہی گیر کی شپ میں علی الصبح 3 سے 4 بجے کے درمیان آگ لگنے کا واقعہ رونما ہوا، تاہم، انڈین کوسٹ گارڈ اور بھارتی نیوی کی بروقت کارروائی سے تمام 18 ماہی گیروں کی زندگیاں بچالی گئیں۔
کراچی: کراچی میٹروپولیٹن یونیورسٹی کے طلبہ فیسوں میں اضافے اور ٹرانسپورٹ کی عدم دستیابی پر سراپا احتجاج بن گئے ہیں۔
تفصیلات کے مطابق کے ایم ڈی سی کے طلبہ نے فیسوں میں اضافے کے خلاف یونیورسٹی کے مرکزی گیٹ پر مظاہرہ کیا، طلبہ کا کہنا تھا کہ فیسوں میں 165 فی صد کا ناجائز اضافہ کیا گیا ہے۔
طلبہ کے مطابق امتحانی فیس میں اضافہ کر کے 32 ہزار روپے مانگے جا رہے ہیں، کالج میں ڈیولپمنٹ چارجز کے نام پر بھی 30 ہزار روپے لیے جا رہے ہیں، کالج میں صرف 2 بسیں قابل استعمال ہیں، جب کہ ڈاؤ سمیت باقی 3 میڈیکل کالجز میں 18 بسیں چلتی ہیں۔
اپوزیشن لیڈر بلدیہ عظمی کراچی ایڈووکیٹ سیف الدین نے میڈیا سے گفتگو کرتے ہوئے کہا کراچی میں جس صورت حال میں ہم رہتے ہیں وہ جنگل سے کم نہیں، طلبہ کے مسائل میں ہم ان کے ساتھ کھڑے ہیں۔
ایڈووکیٹ سیف الدین کا کہنا تھا کہ طلبہ و طالبات کو دھمکیاں دی جاتی ہیں، امتحانات کے اندر 75 ہزار بچوں کو فیل کر دیا گیا، کراچی میں 13 ہزار طلبہ و طالبات کے لیے صرف 2 سینٹر بنائے جاتے ہیں جب کہ دیگر شہروں میں 6 سینٹر بنائے جاتے ہیں۔
انھوں نے کہا میٹروپولیٹن یونیورسٹی میں ایک لاکھ 17 ہزار سے فیس بڑھا کر 2 لاکھ 68 ہزار روپے کر دیا گیا ہے، فیسوں میں ہر سال اضافہ کیا جا رہا ہے، لیکن یونیورسٹی کے بسوں کا حال بہت برا ہے۔
نوشہرہ : دارالعلوم حقانیہ اکوڑہ خٹک میں خودکش دھماکے کا مقدمہ نامعلوم حملہ آور کے خلاف درج کرلیا گیا۔
تفصیلات کے مطابق نوشہرہ میں دارالعلوم حقانیہ اکوڑہ خٹک میں خودکش دھماکے کا مقدمہ درج کرلیا گیا،
مولانا حامدالحق حقانی کے صاحبزادے عبدالحق ثانی کی مدعیت میں نامعلوم حملہ آور کے خلاف مقدمہ درج کیا گیا۔
حکام کا کہنا ہے کہ خود کش حملہ آور کے اعضا فرانزک لیب بھجوادیے گئے اور حملے میں ملوث دہشتگردوں کی جلد نشاندہی کی جائے گی،
گزشتہ روز دھماکے میں مولانا سمیع الحق کےبیٹے حامد الحق سمیت سات افراد شہید ،آٹھ زخمی ہوئے تھے۔
عینی شاہد نے بتایا تھا کہ نماز جمعہ کی ادائیگی کے بعد مولانا حامد الحق مسجد سے نکلنے لگے تو دروازے پر کھڑالڑکاان سے ہاتھ ملانے آگے بڑھا اور خود کو اڑالیا۔
دارالعلوم حقانیہ میں داخلے کے لیے 4 دروازے ہیں، پولیس کا کہنا ہے کہ حملہ آور مولانا حامد الحق کے لیے مخصوص دروازے سے اند رآیا۔
بم ڈسپوزل یونٹ اور پولیس کی ٹیموں نے شواہد اکٹھے کرلیے ہیں اور سی سی ٹی وی فوٹیج بھی حاصل کرلی گئی ہیں۔
امریکا کی ٹرمپ انتظامیہ نے اسرائیل کو 3 ارب ڈالر کا اسلحہ اور بلڈوزرز فروخت کرنے کی منظوری دے دی ہے۔
بین الاقوامی خبر رساں ادارے کی رپورٹ کے مطابق امریکا کی ٹرمپ انتظامیہ کی جانب سے گزشتہ روز 3 ارب ڈالر کا اسلحہ، بلڈوزرز اور دیگر آلات اسرائیل کو فروخت کرنے کی منظوری دی گئی، جس میں غزہ پر استعمال ہونے والا امریکی ساختہ اسلحہ بھی شامل ہے۔
امریکی ڈیفنس سکیورٹی کوآپریشن ایجنسی کا اس حوالے سے کہنا ہے کہ امریکی وزیر خارجہ مارکو روبیو نے اسرائیل کو 2.4 ارب ڈالر کے باڈیزبم اور دیگر ہتھیاروں کی فروخت پر دستخط کردیے ہیں جب کہ 675.7 ملین ڈالر کے دیگر بموں، کٹس اور 295 ملین ڈالر کے بلڈوزرز سمیت دیگر سامان فروخت کرنے کے معاہدوں پر بھی دستخط کردیئے گئے ہیں۔
امریکی ڈیفنس ایجنسی کے مطابق امریکا اسرائیل کے تحفظ کے لیے پوری طرح تیار ہے، یہ امریکی قومی سلامتی کے لیے انتہائی اہم ہے کہ اسرائیل کو اس کے دفاع کے لیے نہ صرف تیار کیا جائے بلکہ اس کی صلاحیتوں میں بھی اضافہ کیا جائے۔
امریکی ایجنسی کا کہنا ہے کہ وزیر خارجہ اسرائیل کو مزید اسلحہ کی فروخت کے لیے پرعزم ہیں جس کی انہوں نے تفصیلی وضاحت دیتے ہوئے اسے اسرائیلی حکومت کی فوری ضرورت قرار دیا اور کہا کہ اسرائیل کو ڈیفنس سروسز اور دیگر چیزوں کی فراہمی امریکا کے قومی مفاد میں ہے۔
واضح رہے کہ امریکا کی جانب سے اسرائیل کو اس سے قبل بھی واشنگٹن 7.4 ارب ڈالر کے بم اور دیگر آلات کی فراہمی کی منظوری دے چکا ہے۔
کراچی : مصطفیٰ عامر قتل کیس میں محکمہ پراسیکیوشن نے پولیس کی تفتیش پر عدم اطمینان کا اظہار کردیا اور انویسٹیگیشن کی تفصیلات طلب کر لی۔
تفصیلات کے مطابق مصطفیٰ عامر کے اغواء اور قتل کیس میں محکمہ پراسکیوشن نے تفتیش پر عدم اطمینان کرتے ہوئے کیس کےتفتیشی افسرسےپیشرفت رپورٹ طلب کرلی تاکہ قانون کے تقاضوں کے مطابق چالان عدالت میں پیش کیا جاسکے۔
ذرائع نے بتایا کہ ارمغان قریشی سمیت اس معاملے میں ملزمان کے خلاف درج 4 مقدمات میں اب تک کیا پیش رفت ہوئی ہے، اس ضمن میں رپورٹ جمع کروائی جائے۔
ذرائع کا کہنا ہے کہ پراسیکیوشن نے استفسار کیا ہے کہ چاروں کیسز میں ملزمان سے اب تک کیا انوسٹی گیشن ہوئی ہے، اب تک کتنے گواہان کے بیانات قلم بند کیے ہیں ،بتایاجائے۔
ذرائع نے کہا کہ بتایا جائے کہ اہم نکات جن پر زور دیا گیا ہے کہ کیس میں ڈی این اے ،فنگر پرنٹس وغیرہ کا فرانزک شروع ہوا یا نہیں ، سی سی ٹی وی ریکارڈ اور مالیاتی پہلو پر کیا شہادتیں حاصل ہوئی ہیں۔
محکمہ پراسیکیوشن کے مطابق اس ہائی پروفائل کیس میں تمام قانونی ضابطے پورے کرکے چالان عدالت میں پیش کیے جائیں گے۔
لاہور : بیرون ملک جانے کی خواہش مند لڑکیاں ہوشیار ہوجائیں، انسانی اسمگلنگ میں ملوث ایجنٹ کا بڑا انکشاف سامنے آگیا۔
تفصیلات کے مطابق ایف آئی اے نے کارروائی کرتے ہوئے انسانی اسمگلنگ میں ملوث ایجنٹ کو فیصل آباد کے علاقے بٹالہ کالونی سے گرفتار کرلیا۔
ایف آئی اے نے بتایا کہ ملزم نے بیرون ملک ملازمت کا جھانسہ دیکرشہریوں سےلاکھوں روپے لیے، ملزم شہریوں کو غیر قانونی طور پر برطانیہ، چین ، آسٹریلیا اور یورپی ممالک بھیجتا تھا۔
ملزم نے بیرون ملک جانے کی خواہش مند لڑکیوں کی جعلی شادیاں کرانے کا انکشاف بھی کیا، لڑکیوں نے جعلی نکاح نامہ کے سرٹیفکیٹس پر ڈیپنڈنٹ ویزے بھی جاری کرائے۔
ترجمان کا کہنا تھا کہ 6 پاکستانی پاسپورٹ،36 ویزہ ایپ فائل، 14میرج سرٹیفکیٹ،5 ورک ویزہ ایگریمنٹ برآمد کرلی گئی ہے۔
ملزم سے4موبائل فون ، لیپ ٹاپ اور دیگر شواہد بھی برآمد کیے گئے، ملزم کےدیگرساتھیوں کیخلاف کارروائیاں جاری ہیں۔
امریکی صدر ڈونلڈ ٹرمپ کے مشیر اور ارب پتی ایلون مسک کا 14 واں بچہ منظرِ عام پر آ گیا ہے۔
دنیا کے سب سے بڑے صنعت کار اور امیر ترین شخصیات کی فہرست میں شامل ایلون مسک کا ایک اور بچہ منظر عام پر آگیا، ایلون مسک نے شیون زیلیس کے ساتھ اپنے چوتھے بچے کا خیرمقدم کیا ہے۔
میڈیا رپورٹس کے مطابق خاتون شیون زیلیس مسک کی کمپنی نیورالنک میں ایگزیکٹو کے عہدے پر فائز ہیں اور ان سے مسک کے پہلے بھی تین دیگر بچے ہیں تاہم اب ان کے ہاں بیٹے کی پیدائش ہوئی ہے۔
شیون زیلیس نے ایکس پر پوسٹ کے ذریعے اس خوشی کی خبر کا اعلان کیا ہے انہون نے لکھا کہ "ایلون کے ساتھ بات کر کے اور خوبصورت آرکیڈیا کی سالگرہ کے موقع پر ہمیں یہ بہتر لگا کہ ہم اپنے پیارے بیٹے سیلڈن لائکرگس کے بارے میں بھی لوگوں کو براہِ راست بتائیں”۔
تاہم شیون زیلیس نے یہ نہیں بتایا کہ بچہ کب پیدا ہوا لیکن ان کی اس پوسٹ پر ایلون نے دل والی ایموجی سے جواب دیا ہے، شیون کے اعلان کے بعد یہ خیال کیا جاتا ہے کہ یہ ایلون مسک کا 14 واں بچہ ہے۔
ٹیسلا اور اسپیش ایکس کے سی ای او ایلون مسک اور نیورالنک میں ایگزیکٹو کے عہدے پر فائز شیون زیلیس کے ہاں 2021 میں جڑواں بچوں کی پیدائش ہوئی تھی، اور 2023 میں ان کے ہاں بیٹی آرکیڈیا کی پیدائش ہوئی۔
