قطر اور متحدہ عرب امارات نے پاکستان اور بھارت کے درمیان حالیہ کشیدگی پر ردعمل دیتے ہوئے دونوں ممالک سے فوجی کشیدگی سے بچنے کا مطالبہ کر دیا۔
قطری نشریاتی ادارے الجزیرہ کی رپورٹ کے مطابق قطر نے کہا کہ پاکستان اور بھارت کے درمیان جاری کشیدگی پر تشویش ہے اور صورتحال کا جائزہ لے رہے ہیں۔
قطر نے زور دیا کہ دونوں ممالک سفارتی ذرائع سے بحران کو حل کریں۔
یہ بھی پڑھیں: پاکستان اور بھارت ذمہ دارانہ حل کےلیے کام کریں، امریکا
ادھر، متحدہ عرب امارات کے نائب وزیر اعظم عبداللہ بن زید النہیان نے دونوں ممالک سے تحمل سے کام لینے کا مطالبہ کیا اور فوجی کشیدگی سے گریز کرنے پر زور دیا۔
اس سے قبل چین کی وزارت خارجہ نے بیان جاری کیا جس میں کہا گیا کہ پاکستان اور بھارت کے درمیان موجودہ صورتحال پر تشویش ہے۔
چین نے کہا کہ بھارت کی جانب سے پاکستان پر حملے افسوسناک ہیں، دونوں ممالک ایک دوسرے کے پڑوسی ہیں اورہمیشہ رہیں گے، دونوں فریقوں پر زور دیتے ہیں امن کے وسیع تر مفاد میں کام کریں۔
وزارت خارجہ کے مطابق دونوں ممالک تحمل کا مظاہرہ کریں اور صورتحال پیچیدہ نہ ہونے دیں، چین ہر قسم کی دہشتگردی کی مذمت کرتا ہے۔
