راولپنڈی: پاک فوج کے شعبہ تعلقات عامہ (آئی ایس پی آر) کا کہنا ہے کہ فوج نے شدید برفباری میں پھنسے لمز یونیورسٹی کے 22 طالب علموں کو ریسکیو کر لیا ہے۔
تفصیلات کے مطابق آئی ایس پی آر کا کہنا ہے کہ طلبہ کو برفباری سے متاثرہ رٹو کے مقام سے راولپنڈی منتقل کیا گیا، لمز کے طلبہ گلگت گئے تھے جہاں وہ 5 روز سے پھنسے ہوئے تھے۔
فوج نے کہا ہے کہ لمز انتظامیہ نے پاک فوج سے مدد کی درخواست کی تھی، آرمی چیف جنرل قمرجاوید باجوہ کی ہدایت پر طلبہ کو ہیلی کاپٹر کے ذریعے منتقل کیا گیا۔ 22 طلبہ میں 13 لڑکے اور 9لڑکیاں شامل ہیں۔
واضح رہے کہ حالیہ برفباری سے ہونے والے تباہی میں پاک فوج نے بڑھ چڑھ کر امدادی کارروائیوں میں حصہ لیا۔ متاثرہ علاقوں میں ریسکیو اور لوگوں کو ریلیف فراہم کیا گیا۔ آرمی ہیلی کاپٹر کے ذریعے امدادی سامان متاثرین تک پہنچائے گئے۔
بلوچستان : پارہ نقطہ انجماد سے گرگیا, مزید برفباری و بارش کی پیش گوئی
پاک فوج نے متاثرین کو خیمے کمبل، راشن، ادویات اور تیار کھانا فراہم کیا، فوجی جوانوں ایف ڈبلیو او اور سول انتظامیہ مشترکہ اقدامات کیں۔ خیال رہے کہ بلوچستان میں موسم مزید ٹھنڈا ہوگیا، کوئٹہ سمیت بلوچستان کے بیشتر اضلاع میں پارہ نقطہ انجماد سے نیچے گرگیا، مزید برفباری و بارش کی پیش گوئی کے بعد پی ڈی ایم اے، متعلقہ اداروں، ضلعی انتظامیہ نے حکمت عملی تیار کرلی۔
بلوچستان میں موسم کی صورتحال مزید سرد ہوتا جارہا ہے، صوبے کے بیشتر اضلاع میں پارہ نقطہ انجماد سے نیچے گرگیا، قلات میں کم سے کم درجہ حرارت منفی11 تک ہوگیا ہے۔
