آسٹریلیا سے شکست کھانے کے بعد پاکستانی ٹیم آئی سی سی ون ڈے ورلڈکپ میں اپنا پانچواں اور اہم ترین میچ آج افغانستان کیخلاف چنئی میں کھیلے گی۔
میگا ایونٹ میں واپسی کے لئے قومی ٹیم کے کھلاڑیوں کے حوصلے بلند ہیں، اسپنرز کے لیے سازگار وکٹ پر افغان بولر راشد خان کا جادو چلے گا، یا شاہینوں کا پیس اٹیک میچ بچائے گا؟ صورتحال آج واضح ہوجائے گی۔
آئی سی سی کرکٹ ورلڈکپ میں پاکستان اور افغانستان کی ٹیموں کے مابین میچ میں شائقین اپنے موبائل فونز اور کیمرے ساتھ نہیں لاسکیں گے۔
تمل ناڈو کرکٹ ایسوسی ایشن کی جانب سے ورلڈکپ میں مذکورہ میچ کے حوالے سے تماشائیوں کیلئے ایڈوائزری جاری کی گئی ہے۔
ٹی این سی اے نے جاری اعلامیے میں کہا کہ تماشائی ہینڈ بیگ، لیپ ٹاپ، آئی پوڈ، کیمرہ اور فون ساتھ نہ لائیں۔ چارجر، پاور بینک، لائٹر، تمباکو، بوتلیں، بینرز لانے کی اجازت بھی نہیں ہوگی۔
افغان ٹیم کے خلاف آج ہونے والے آئی سی سی ورلڈکپ کے میچ میں قومی ٹیم میں کوئی تبدیلی نہیں کی جائے گی۔
آسٹریلیا کیخلاف کھیلنے والی ٹیم آج افغانستان کیخلاف بھی میدان میں اترے گی۔ اوپنرفخر زمان نے بھی نیٹس میں بیٹنگ کرنا شروع کر دی ہے تاہم وہ میچ نہیں کھیلیں گے۔
