The news is by your side.

Advertisement

پاکستان اور انگلینڈ کے درمیان کھیلا جانے والا پہلا ون ڈے میچ بارش کی نذر

لندن: پاکستان اور انگلینڈ کے درمیان کھیلا جانے والا پہلا ون ڈے میچ بارش کے باعث منسوخ کردیا گیا۔

تفصیلات کے مطابق پاکستان اور انگلینڈ کے درمیان کھیلا جانے والا پہلا ون ڈے میچ بارش کے باعث منسوخ کردیا گیا، بارش کے سبب میچ کو 41 اوور تک محدود کیا گیا تھا تاہم بارش دوبارہ شروع ہوئی جس کے سبب میچ کو ختم کرنا پڑا، پاکستان نے 19 اوورز میں 2 وکٹوں کے نقصان پر 80 رنز بنائے تھے۔

اوپنر فخر زمان 3 اور بابر اعظم 12 رنز بنا کر پویلین لوٹ گئے، امام الحق 42 اور حارث سہیل 14 رنز بنا کر ناٹ آؤٹ رہے۔

انگلینڈ کی جانب سے جوفرا آکر اور لیام پلنکٹ نے ایک، ایک وکٹ حاصل کی، دونوں ٹیموں کے درمیان دوسرا ون ڈے میچ 11 مئی کو کھیلا جائے گا۔

قبل ازیں انگلینڈ نے پاکستان کے خلاف ٹاس جیت کر فیلڈنگ کا فیصلہ کیا ہے، بارش کی وجہ سے میچ 47 اوور تک محدود کردیا گیا ہے۔

 اوول گراؤنڈ انگلینڈ میں آج سے پاک انگلینڈ ون ڈے سیریز کا پہلا میچ کھیلا جارہا ہے، گراؤنڈ انتظامیہ وقفے وقفے سے ہونے والی بارش سے پریشان ہے اور بارش کی وجہ سے میچ تاخیر کا شکار بھی ہوا۔

محمد حفیظ بدستور مکمل فٹنس حاصل کرنے میں کامیاب نہیں ہو سکے ہیں، محمد حفیظ اور شعیب ملک پہلے ون ڈے میں شرکت نہیں کر سکیں گے۔

پاکستان کی ٹیم میں سرفراز احمد کپتان، فخرزمان، امام الحق، بابر اعظم، آصف علی، حارث سہیل، عماد وسیم، فہیم اشرف، محمد عامر، حسن علی، شاہین شاہ آفریدی شامل ہیں۔

انگلینڈ کی ٹیم میں ایون مورگن کپتان، بیرسٹو، جیمز ونس، جو روٹ، بین اسٹوکس، جوس بٹلر، جو ڈینلی، ووکس، لیام پلنکٹ، راشد خان اور آکر شامل ہیں۔

خیال رہے کہ کارڈف میں کھیلے گئے واحد ٹی 20 میچ میں پاکستان کو سات وکٹوں سے شکست ہوئی، اب دونوں ٹیموں کے درمیان 5 میچز پر مشتمل سیریز کھیلی جائے گی۔

اب تک ہونے والے باہمی ون ڈے مقابلوں میں میزبان کا پلڑا بھاری رہا، پاکستان ٹیم 82 میچز میں 31 فتوحات حاصل کر پائی، جب کہ انگلینڈ کو 49 میں فتح نصیب ہوئی۔

انگلش سرزمین پر دونوں ٹیمیں 42 بار مد مقابل ہوئیں، گرین شرٹس 15 میں کام یاب ہوئے، 26 میں میزبان ٹیم نے برتری ثابت کی، ایک میچ بے نتیجہ رہا۔

Comments

یہ بھی پڑھیں