اسلام آباد: کرونا سے بچاؤ کی ویکسین کے لیے پاکستان نے ایڈوانس بکنگ کا فیصلہ کر لیا۔
تفصیلات کے مطابق وزیر اعظم نے کرونا ویکسین کی ایڈوانس بکنگ کرانے کی منظوری دے دی ہے، اب ویکسین کے حصول کے لیے عالمی سطح پر رابطے کیے جا رہے ہیں۔
اس سلسلے میں وزارتِ صحت کی پارلیمانی سیکریٹری ڈاکٹر نوشین حامد نے اے آر وائی نیوز سےگفتگو کرتے ہوئے بتایا کہ وزیر اعظم نے کرونا ویکسین کی ایڈوانس بکنگ کی منظوری دے دی، اب ویکسین کی ایڈوانس بکنگ کے لیے عالمی سطح پر رابطے جاری ہیں۔
ڈاکٹر نوشین حامد کا کہنا تھا کہ ایڈوانس بکنگ کے لیے 2 ویکسین ساز اداروں سے رابطے ہو چکے ہیں، امید ہے پاکستان کرونا ویکسین کی ایڈوانس بکنگ میں کامیاب ہوگا۔
پاکستان میں کورونا کی شدت میں اضافہ، ایک دن میں 33 اموات، 2 ہزار سے زائد کیسز رپورٹ
ذرایع کا کہنا ہے کہ وزارت صحت نے ایک کروڑ شہریوں کے لیے کرونا ویکسین کی بکنگ اور اس کے لیے 100 ملین ڈالر مختص کرنے کی تجویز دی تھی۔
ذرایع کے مطابق پہلے فیز میں ہیلتھ ورکرز اور ضعیف شہریوں کے لیے ویکسین بکنگ کی تجویز ہے۔
واضح رہے کہ کرونا کی دوسری لہر نے ملک بھر میں خطرناک صورت اختیار کر لی ہے، ایک دن میں 33 اموات ریکارڈ کی گئیں جب کہ 2 ہزار 50 نئے کیسز سامنے آئے، جس کے بعد ملک میں مجموعی کیسز 3 لاکھ 61 ہزار 82 تک جا پہنچے ہیں۔
