اسلام آباد : بیرون ملک جانے والے مسافروں کو تیز امیگریشن سروس مہیا کرنے کے لیے ای گیٹس کا بنیادی ڈیزائن فائنل کرلیا گیا۔
تفصیلات کے مطابق پاکستان کے تین بڑے ایئرپورٹس پر ای گیٹس کی تنصیب میں بڑی پیش رفت سامنے آئی۔
پاکستان ائیرپورٹس اتھارٹی نے بتایا کہ جرمن ماہرین نے دورہ پاکستان میں ای گیٹس کا بنیادی ڈیزائن فائنل کرلیا۔
جدت کے حامل منصوبے کے تحت اسلام آباد،کراچی اور لاہور ائیرپورٹس پر ای گیٹ کی تنصیب ہوگی۔
ائیرپورٹس اتھارٹی نے کہا کہ تین روزہ ورکشاپس میں جرمن ماہرین نے اسٹیک ہولڈرز سے مشاورت مکمل کی ، ای گیٹس تنصیب کے بعد مسافر خودکار نظام کے تحت برق رفتاری سے امیگریشن مراحل طے کرسکیں گے۔
اتھارٹی کا مزید کہنا تھا کہ پاکستان کے ہوائی اڈوں کو بین الاقوامی معیار کے مطابق ڈھالنے کی کوششوں کا حصہ بھی ہے۔
مزید پڑھیں : کن ایئرپورٹس پر ای گیٹس لگائے جارہے ہیں؟
ترجمان کے مطابق یہ منصوبہ پاکستان کے بڑے ایئرپورٹس کے لیے ایک محفوظ، قابلِ توسیع اور جدید ٹیکنالوجی پر مبنی حل فراہم کرے گا، کنسلٹنٹس معاہدے کے مطابق تسلی بخش کام کر رہے ہیں۔
یاد رہے اپریل میں بھی جرمن کمپنی کے نمائندگان نے پاکستان ایئرپورٹس اتھارٹی کراچی ہیڈکوارٹرز کا دورہ کیا تھا اور ای گیٹس کی تنصیب کے حوالے سے منصوبے کا جائزہ لیا۔
پی اےاے کا کہنا تھا کہ اسلام آباد، لاہور، کراچی ایئرپورٹس پر ای گیٹس لگائے جائیں گے، کمپنی منیجنگ پارٹنر اور ڈائریکٹر انجینئرنگ سروسز نے معاہدے پر دستخط کیے ہیں۔
