راولپنڈی : ڈی جی آئی ایس پی آر میجر جنرل احمد شریف چوہدری کا کہنا ہے کہ سانحہ 9 مئی پر فوجی تنصیبات کی سیکیورٹی برقرار رکھنے میں ناکامی پر کئی فوجی افسران کو بر خاست کردیا گیا ہے۔
تفصیلات کے مطابق ڈی جی آئی ایس پی آر میجر جنرل احمد شریف چوہدری نے پریس کانفرنس کرتے ہوئے کہا کہ پاک فوج کی فیصلہ سازی میں مکمل ہم آہنگی ہے ، ناقابل تردیدزمینی حقائق کےباوجودگزشتہ ایک سال سےجھوٹاپروپیگنڈاچلایاجارہاہے اور انقلاب کا جھوٹا نعرہ لگا کر بغاوت پر اکسایا گیا۔
ڈی جی آئی ایس پی آر کا کہنا تھا کہ پاک آرمی کی فیصلہ سازی میں مکمل ہم آہنگی اورکلیریٹی ہے، ملٹری لیڈرشپ اور افواج پاکستان 9 مئی واقعات سے جڑے عناصر سے بخوبی واقف ہیں۔
میجر جنرل احمد شریف چوہدری نے کہا کہ سانحہ 9مئی بھلایا نہیں جائےگا اور نہ ہی ملوث شرپسندعناصر کو معاف کیاجاسکتاہے، سانحہ 9مئی سےجڑےتمام سہولت کاروں اور ملوث افراد کو آئین کے مطابق سزادی جائےگی، چاہے ان کا تعلق کسی سیاسی جماعت اور ادارے سے ہو منطقی انجام تک پہنچایا جائے گا۔
انھوں نے بتایا کہ فوجی تنصیبات کی سیکیورٹی برقرار رکھنے میں ناکامی پر اعلیٰ فوجی افسران کے خلاف کارروائیاں کی گئی ہیں ، لیفٹیننٹ جنرل سمیت تین افسران کو نوکری سے برخاست کیاگیا ہے،3 میجرجنرل،7 بریگیڈیئرزسمیت15افسران کیخلاف تادیبی کارروائی کی جاچکی ہے۔
ڈی جی آئی ایس پی آر نے مزید کہا کہ فوج میں خود احتسابی کا عمل بغیر کسی تفریق کےمکمل کیا جاتا ہے، فوج کےاحتسابی عمل میں کسی عہدے یامعاشرتی حیثیت میں کوئی فرق نہیں رکھاجاتا، فوج میں جتنا بڑا عہدہ ہوگا اتنی بڑی ذمہ داری نبھانی پڑتی ہے۔
میجر جنرل احمد شریف چوہدری کا کہنا تھا کہ فوج نے اپنی روایات کے مطابق خوداحتسابی عمل کو مکمل کرلیا ہے، گریژن میں پرتشدد واقعات پر ادارہ جاتی جامع انکوائری میجر جنرل عہدے کے افسران نے کی، ذمہ داران کیخلاف تادیبی کارروائی گریژن ، فوجی تنصیبات ،جناح ہاؤس کا تقدس ناکام ہونے پر کی گئی، یہ کورٹ آف انکوائری کی سفارش کو مدنظر رکھ کر فیصلہ کیا گیا۔
انھوں نے مزید بتایا کہ ریٹائرڈافسران کےاہل خانہ بھی احتساب کاسامناکررہےہیں، ایک ریٹائرڈ 4 اسٹارجنرل کی نواسی، ریٹائرڈ 4 اسٹار جنرل کا داماد احتسابی عمل سےگزررہےہیں، ریٹائرڈ تھری اسٹار کی بیگم اور ریٹائرڈ ٹو اسٹار جنرل کی بیگم اور داماد احتسابی عمل سےگزررہےہیں۔
ڈی جی آئی ایس پی آر کا کہنا تھا کہ 9 مئی واقعات کا مقصدفوجی تنصیبات پر لوگوں کو بھیجنا اور فوج کو اشتعال دلاکرردعمل تھا، یہ فوج کےفوری ردعمل سےمذموم سیاسی مقاصد کو مزید آگے لیکر جانا چاہتے تھے، ضروری تھافوجی تنصیبات،جی ایچ کیو،گیریژنز،جناح ہاؤس کی سیکیورٹی میں غفلت کاتعین ہو، غفلت جانچنے کے لئے فوج میں ایک ٹائم پیریڈہوتا ہے۔
