گلاسگو : پاکستانی نژاد حمزہ یوسف اسکاٹش نیشنل پارٹی کے پہلے مسلمان سربراہ بن گئے ، حمزہ یوسف اسکاٹ لینڈ کی فرسٹ منسٹر نکولا اسٹرجن کی جگہ لیں گے۔
تفصیلات کے مطابق پاکستانی نژاد حمزہ یوسف اسکاٹش نیشنل پارٹی کے پہلے مسلمان سربراہ منتخب ہوگئے،حمزہ یوسف اپنی پارٹی اراکین کے ووٹ کے بعداسکاٹش نیشنل پارٹی کےسربراہ منتخب ہوئے۔
حمزہ یوسف کا ایس این پی لیڈر شپ کے انتخاب میں کیٹ فوربز اور ایش ریگن سے مقابلہ تھا، ایش ریگن کے پہلے راؤنڈ سے باہر ہونے کے بعد حمزہ یوسف نے دوسرے راؤنڈ میں باون فیصد ووٹ حاصل کیے، فوربز کو اڑتالیس فیصد ووٹ ملے۔
سینتیس سالہ حمزہ یوسف اسکاٹ لینڈ کی فرسٹ منسٹر نکولا اسٹرجن کی جگہ لیں گے، جو گزشتہ ماہ آٹھ برس تک ایس این پی کی سربراہ رہنے کے بعد اپنے عہدے سے مستعفی ہو گئی تھیں۔
حمزہ یوسف دو ہزار گیارہ میں چھبیس سال کی عمرمیں ممبر اسکاٹش پارلیمنٹ منتخب ہوئے تھے، وہ اس وقت سب سے کم عمر ممبر آف اسکاٹش پارلیمنٹ تھے۔
حمزہ یوسف برطانیہ کی کسی بڑی پارٹی کی قیادت کرنے والے پہلےمسلمان اور پاکستانی ہیں ، اس وقت وہ اسکاٹ لینڈ کے ہیلتھ سیکریٹری ہیں اور ان کےوالدین کاتعلق پاکستان کےشہرمیاں چنوں سے ہے۔
واضح رہے کہ حال ہی میں رشی سونک کنزرویٹو پارٹی کے سربراہ منتخب ہوئے اور وہ ایشیائی نژاد برطانوی وزیراعظم ہیں، ان کے آباؤ اجداد کا تعلق پاکستان سے ہے۔
