پاکستان نے قطر میں قائم امریکی العدید ایئر بیس پر حالیہ حملوں کے بعد خطے میں سیکیورٹی کی بگڑتی ہوئی صورتحال پر گہری تشویش کا اظہار کیا ہے۔
تفصیلات کے مطابق ترجمان دفتر خارجہ نے ایک بیان میں تمام ممالک کی خودمختاری و علاقائی سالمیت کے احترام کے اصول کی حالیہ خلاف ورزیوں کی سخت مذمت کی ہے۔
ترجمان نے مزید کہا کہ پاکستان عالمی قوانین کے بنیادی اصولوں کی مکمل پاسداری پر زور دیتا ہے اور چاہتا ہے کہ تمام تنازعات کو پرامن بات چیت اور سفارتی ذرائع سے حل کیا جائے۔
دفتر خارجہ نے تمام متعلقہ فریقین سے مطالبہ کیا ہے کہ وہ تحمل کا مظاہرہ کریں اور ایسی کارروائیوں سے گریز کریں جو خطے میں مزید کشیدگی کا باعث بن سکتی ہیں۔
ترجمان نے یہ بھی کہا کہ پاکستان کشیدگی میں کمی اور استحکام کے لیے ہر ممکن سفارتی کردار ادا کرنے کو تیار ہے۔
واضح رہے کہ جوہری تنصیبات پر امریکی حملے کے جواب میں ایران نے قطر میں امریکا کے بڑے فوجی اڈے پر میزائل ڈاغے جس کے چند گھنٹے بعد ڈونلڈ ٹرمپ نے دعویٰ کیا کہ ایران اور اسرائیل جنگ بندی پر رضامند ہوگئے ہیں۔
امریکی صدر نے سوشل میڈیا پر جاری پیغام میں لکھا کہ اسرائیل اور ایران جنگ بندی پر اتفاق ہوگیا ہے، دونوں ملک باقاعدہ جنگ کے خاتمے کا اعلان کریں گے۔
ڈونلڈ ٹرمپ کا کہنا تھا کہ تمام لوگوں کو مبارک ہو، اسرائیل اور ایران کے درمیان مکمل اور جامع سیز فائر پر مکمل اتفاق ہوگیا ہے، بعدازاں ایران اور اسرائیل نے سیز فائر کا باضابطہ اعلان کیا۔
