اسلام آباد : پاکستان نے سلامتی کونسل کی غزہ میں جنگ بندی نہ کرانے پرسخت مایوسی کا اظہار کرتے ہوئے کہا سیکرٹری جنرل کےآرٹیکل 99کی درخواست کے باوجود غزہ میں جنگ بندی نہ ہوسکی۔
تفصیلات کے مطابق ترجمان دفترخارجہ کی جانب سے بیان میں سلامتی کونسل کی غزہ میں جنگ بندی نہ کرانے پر سخت مایوسی کا اظہار کرتے ہوئے کہا کہ اقوام متحدہ کی سلامتی کونسل غزہ میں جنگ بندی کرانےمیں ناکام رہی۔
ترجمان کا کہنا تھا کہ پاکستان غزہ میں فوری جنگ بندی کے مطالبےکا اعادہ کرتا ہے، سلامتی کونسل میں ایک بار پھرغزہ میں جنگ بندی کی اپیل ناکام ہونے پر مایوسی ہوئی، سیکرٹری جنرل کےآرٹیکل 99کی درخواست کےباجودغزہ میں جنگ بندی نہ ہوسکی۔
دفترخارجہ نے کہا کہ غزہ کےعوام جوسزا برداشت کررہے ہیں وہ ناقابل قبول ہے، فلسطین میں اسرائیل کی جارحیت کا تسلسل انسانی مسائل کو طول دے گا۔
ترجمان کا مزید کہنا تھا کہ اسرائیلی جارحیت خطے میں وسیع اور خطرناک تنازع کو جنم دے سکتا ہے، ذمہ داری ان پرعائد ہوتی ہےجنہوں نےغزہ پر بمباری کو طول دینےمیں تعاون کیا، اسرائیل غزہ کیخلاف اپنے وحشیانہ حملے اور غیر انسانی محاصرہ ختم کرے، پاکستان سلامتی کونسل پرفوری جنگ ختم کرنے پرزور دیتا ہے۔
