ابوظبی: بین الاقوامی اسلامی تعاون تنظیم (او آئی سی) نے 46 ویں اجلاس میں کہا ہے کہ پاکستان کو اپنے دفاع کا حق حاصل ہے۔
تفصیلات کے مطابق بھارت کی جانب سے پاکستان کے خلاف او آئی سی کے اجلاس میں پروپگینڈا کیے جانے کے باوجود اجلاس میں بھارت ہی کے خلاف قرارداد منظور کی گئی۔
دفترِ خارجہ کے ترجمان کے مطابق او آئی سی نے پاکستانی فضائی حدود کی خلاف ورزی کی مذمت کرتے ہوئے کہا کہ پاکستان کو اپنے دفاع کا حق حاصل ہے۔
ترجمان دفترِ خارجہ نے کہا کہ او آئی سی نے وزیرِ اعظم عمران خان کے امن کے لیے ادا کیے جانے والے کردار کو سراہا۔
ترجمان نے بتایا کہ اسلامی تعاون تنظیم نے بھارتی پائلٹ کی واپسی پر بھی پاکستان کی تعریف کی، دوسری طرف بھارت کی طرف سے مقبوضہ کشمیر میں انسانی حقوق کی خلاف ورزیوں اور مظالم پر اظہارِ تشویش کرتے ہوئے عالمی برادری سے مطالبہ کیا کہ وہ اقوامِ متحدہ کی قراردادوں پر عمل درآمد کرائے۔
یہ بھی پڑھیں: او آئی سی محاذ پر بھارت کو بڑی شکست، مسئلہ کشمیر کا حل ناگزیر ہے، قرارداد پاس
او آئی سی نے تصفیہ طلب مسائل پُر امن طریقے سے حل کرنے پر بھی زور دیا، اور کہا کہ بھارت طاقت کے استعمال اور دھمکیوں سے گریز کرے۔
خیال رہے کہ بین الاقوامی اسلامی تعاون تنظیم کے اجلاس میں پاکستان کو ایشیا میں انسانی حقوق کمیشن کا مستقل رکن منتخب کر لیا گیا ہے۔
