کرکٹ کے میگا ایونٹ ورلڈ کپ کا سب سے بڑا مقابلہ پاک بھارت دیکھنے کا جنون اتنا ہے کہ شائقین کئی ماہ قبل احمد آباد کے اسپتالوں میں بیڈ بُک کرانے لگے ہیں۔
کھیل کوئی بھی ہو شائقین کرکٹ اسے دیکھنے کے لیے میدانوں کا رخ کرتے ہیں اور اگر وہ بیرون ملک یا بیرون شہر سے آ رہے ہیں تو ہوٹلوں کی بکنگ کراتے ہیں لیکن پاک بھارت ٹاکرا جو کہیں بھی اور کسی بھی ایونٹ میں ہو کھیل کی دنیا میں ایسی جنگ ہوتا ہے جہاں کھلاڑیوں سے لے کر شائقین تک کا جوش وجذبہ مختلف ہوتا ہے اور ایسے میں کچھ منفرد واقعات بھی ہوتے ہیں۔
کرکٹ کا میگا ایونٹ ورلڈ کپ 5 اکتوبر سے بھارت میں شروع ہوگا جس کا فائنل تو نومبر میں کھیلا جائے گا لیکن فائنل سے سے بڑا مقابلہ روایتی حریفوں پاکستان اور بھارت کے درمیان 15 اکتوبر کو احمد آباد کے نریندر مودی اسٹیڈیم میں شیڈول ہے جس کو دیکھنے کے لیے کرکٹ کے دیوانے اس قدر بے قرار ہیں اور وہ اس کے لیے اسپتالوں کے بیڈ تک کئی ماہ قبل بُک کرانے لگے ہیں۔
انڈین میڈیا کے مطابق پاک بھارت کے بڑے مقابلے کے پیش نظر احمد آباد میں ہوٹلوں کے کرائے آسمان سے باتیں کر رہے ہیں اور اسٹارز ہوٹلز کے ساتھ عام ہوٹلز نے بھی اپنے کرایوں میں کئی گنا اضافہ کر دیا ہے۔
پاک بھارت میچ کے دوران ہوٹلز بکنگ کی معلومات میں بتایا گیا ہے کہ ہوٹلز کے ڈیلکس کمرے کی قیمت 5 ہزار 699 روپے سے بڑھ کر 71 ہزار 999 بھارتی روپے تک پہنچ گئی ہے جبکہ ایس جی ہائی وے پر واقع رینیسنس احمد آباد ہوٹل نے میچ کے روز کمرے کی بکنگ 8 ہزار سے بڑھا کر 90 ہزار 679 بھارتی روپے تک کر دی ہے۔
ہوٹلوں کے منہ مانگے داموں کرائے کے باعث عام شائقین کرکٹ کی پریشانیوں میں اضافہ ہوگیا جس کا انہوں نے انوکھا حل نکالا ہے اور شائقین کرکٹ نے اپنی فیملیز و دوستوں کے ساتھ مل کر اس سنسنی خیز مقابلے کو دیکھنے کے اسپتالوں کا رخ کرلیا ہے اور وہاں کمروں کی بکنگ کرا رہے ہیں کیونکہ وہاں کے کرائے ہوٹلوں کے کہیں کم ہیں۔
ہوٹل کی نسبت اسپتالوں میں ایک سے دو رات قیام کا کرایہ 3 ہزار روپے سے 25 ہزار روپے تک ہے۔ اس کے ساتھ ہی انہیں کھانا اور طبی معائنے کی سہولت بھی حاصل ہوگی۔
رپورٹ کے مطابق مقامی ڈاکٹرز کا کہنا ہے کہ لوگوں کی بڑی تعداد چیک کے بہانے اسپتالوں کا رخ کر رہی ہے اور مذکورہ تاریخ کے دوران کمروں کی بکنگ کی معلومات حاصل کر رہے ہیں۔
شائقین کرکٹ کا جوش وخروش دیکھتے ہوئے اسپتالوں کی انتظامیہ نے انہیں یہ سہولت دینے کا فیصلہ کیا ہے اور اب پاک بھارت میچ پر مریضوں کے علاج کے ساتھ انہیں میچ سے پہلے ایک رات تک قیام کی بھی اجازت ہوگی۔
ویسے پاک بھارت ٹاکرا لمحہ لمحہ شائقین کرکٹ کے دلوں کی دھڑکنیں گھٹاتا بڑھاتا رہتا ہے اور کئی تو اپنی طبعیت خرابی کے باعث اسپتال بھی پہنچ جاتے ہیں تو ایسی صورت میں اسپتال کے بیڈ پر میچ دیکھنا ایک اچھا آپشن ہو سکتا ہے۔
