لاہور: مقبوضہ وادی میں جاری مظالم اور لائن آف کنٹرول پر بھارتی جارحیت کے خلاف اقلیتی برادری کا پریس کلب کے باہر احتجاجی مظاہرہ ہوا جس میں بھارتی وزیر اعظم نریندر مودی کا پتلا بھی نذر آتش کیا گیا۔
تفصیلات کے مطابق مقبوضہ وادی میں کشمیریوں پر بھارتی افواج کے مظالم کے خلاف اور مظلوم کشمیریوں سے اظہار یکجہتی کے لیے اقلیتی برادری کے تحت لاہور پریس کلب کے باہر احتجاجی مظاہرہ کیا گیا۔
اس موقع پر پنجاب میں بسنے والی مختلف اقلیتی جماعتوں کے کارکنان نے بڑی تعداد میں شرکت کی اور کشمیر میں جاری بھارتی مظالم اور افواج کے خلاف نعرے بازی کی۔مظاہرین نے نہتے کشمیریوں سے اظہارِ یکجہتی کیا اور بھارتی وزیر اعظم نریندر مودی کا پتلا بھی نذر آتش کیا۔
پڑھیں: مقبوضہ کشمیرمیں بھارتی بربریت،12سالہ بچہ شہید
یاد رہے حریت رہنماء برہان مظفر وانی کی شہادت کے بعد سے کشمیر میں حالات کشیدہ ہوگئے ہیں اور کشمیری تحریک آزادی کے لیے ایک بار پھر متحد ہوگئے ہیں، حریت کمانڈر کے نماز جنازہ میں شرکت پر بھارتی افواج کی جانب سے مظاہرین پر فائرنگ کی گئی جس کے بعد سے وادی میں احتجاجی مظاہروں کا سلسلہ جاری ہے۔