اسلام آباد: وزارت خزانہ کے ذرائع نے کہا ہے کہ حکومت نے آئی ایم ایف سے نئے قرض پروگرام کے لیے ابتدائی پلان بنا لیا ہے۔
تفصیلات کے مطابق ایک ارب دس کروڑ ڈالر کی آخری قسط کی وصولی کے لیے پاکستان اور آئی ایم ایف میں اسٹاف لیول معاہدے کے بعد اب حکومت نے نئے قرض پروگرام کے لیے ابتدائی پلان بنا لیا ہے۔
وزارت خزانہ کے ذرائع کا کہنا ہے کہ نئے قرض پروگرام کے حجم اور دورانیے کو تاحال حتمی شکل نہیں دی گئی، یہ نیا قرض پروگرام 3 سال یا اس سے زائد عرصے کے لیے ہو سکتا ہے، اس کا ممکنہ حجم 6 سے 8 ارب ڈالرز کا ہوگا۔
ذرائع کے مطابق ایف بی آر میں اصلاحات کی جائیں گی، ٹیکس نیٹ بڑھایا جائے گا، تقریباً 31 لاکھ ریٹیلرز کو ٹیکس نیٹ میں لانے کے لیے پلان بنا لیا گیا ہے، ریئل اسٹیٹ، زرعی شعبے سے ٹیکس وصولی ترجیحات میں شامل ہوگی، جو شعبے ٹیکس نیٹ میں نہیں ہیں ان کو ٹیکس نیٹ میں لایا جائے گا۔
ذرائع کے مطابق 15 سے 20 لاکھ نئے ٹیکس دہندگان کو ٹیکس نیٹ میں لانے پر کام ہو رہا ہے، ٹیکس نیٹ کو وسیع کرنے اور ٹیکس ٹو جی ڈی پی تناسب کو بڑھانے پر کام کیا جائے گا، ٹیکنالوجی میں سرمایہ کاری کے ذریعے بھی ٹیکس نیٹ بڑھانے پر کام کیا جائے گا، حکومت گیس شعبے میں اصلاحات اور سستی توانائی پلان پر بھی کام کر رہی ہے، اس سلسلے میں مقامی وسائل پر انحصار حکومت کی ترجیح ہے۔
حکومتی ذرائع کا کہنا ہے کہ درآمد پر انحصار کم اور مقامی وسائل سے پیداوار بڑھانا حکومت کی ترجیح ہے، مقامی آئل ریفائنریز سے پیداوار بڑھانے کے پلان پر کام ہو رہا ہے، جس کی اپ گریڈیشن سے ساڑھے 6 ارب ڈالرز سرمایہ کاری متوقع ہے، بجلی کی تقسیم اور ترسیل کا نظام بھی بہتر بنایا جائے گا، اور توانائی شعبے کے سرکلر ڈیٹ میں اضافہ نہیں ہونے دیا جائے گا۔
