تازہ ترین

تاپی گیس منصوبے پر جلد پیش رفت ہوگی، نواز شریف، ترکمانستان پہنچ گئے

اشک آباد: وزیر اعظم نواز شریف دو روزہ دورے پر ترکمانستان پہنچ گئے جہاں انہوں نے ترکمانستان کے صدر سے ملاقات کی اور مختلف امور پر تبادلہ خیال کیا، نواز شریف کا کہنا تھا کہ ترکمانستان کے ساتھ دوستی وقت کے ساتھ ساتھ مضبوط ہورہی ہے۔

اطلاعات کے مطابق وزیراعظم نواز شریف اعلیٰ سطح وفد کے ہمراہ دو روزہ دورے پر آج ترکمانستان پہنچے ہیں، انہیں ترکمانستان کے صدر قربان علی بردی نے دورے کی دعوت دی تھی۔

انہوں ںے کچھ دیر قبل ترکمانستان کے صدر سے ملاقات کی جس میں باہمی دلچسپی کے امور پر تبادلہ خیال کیا گیا۔

وزیر اعظم نواز شریف کا کہنا تھا کہ پاکستان ترکمانستان دوستی وقت کے ساتھ ساتھ مضبوط ہورہی ہے۔

انہوں نے کہا کہ تاپی گیس پائپ لائن منصوبے پر جلد پیش رفت ہوگی ساتھ ہی سی پیک سے پورے خطے میں ترقی ہوگی۔

وزیراعظم نواز شریف اپنے دورے میں دارالحکومت اشک آباد میں پائیدار ٹرانسپورٹ کے بارے میں منعقدہ پہلی عالمی کانفرنس میں اپنے وفد کی قیادت بھی کریں گے۔

اقوام متحدہ کے سیکریٹری جنرل بان کی مون اور ترکمانستان مشترکہ طور پراس کانفرنس کی میزبانی کر رہے ہیں،جس میں حکومتی سربراہوں، وزرا، نجی شعبوں کے چیف، سول سوسائٹی کے رہنما اقوام متحدہ کے حکام سمیت 15 مندوبین شرکت کر رہے ہیں۔

کانفرنس میں پائیدار ترقی کے ایجنڈا 2030ء کے تحت پائیدار ٹرانسپورٹ کے حوالے سے مختلف امور پر تبادلہ خیال کیا جائے گا۔

واضح رہے کہ پاکستان ٹرانسپورٹ اور مواصلاتی رابطوں کے ذریعے وسط ایشیا کی ریاستوں کے ساتھ رابطوں کے فروغ کا خواہاں ہے۔

Comments

- Advertisement -