اسلام آباد : آئی ایم ایف نے حالیہ سیلاب سے ہونے والے جانی و مالی نقصانات پر گہری ہمدردی اور تشویش کا اظہار کرتے ہوئے اس مشکل وقت میں پاکستان کی امداد کرنے کے عزم کا اعادہ کیا۔
تفصیلات کے مطابق منیجنگ ڈائریکٹر انٹرنیشنل مانیٹری فنڈ کرسٹالینا جارجیوا کا وزیراعظم محمد شہباز شریف سے ٹیلی فونک رابطہ ہوا۔
جس میں ایم ڈی آئی ایم ایف نے حالیہ سیلاب سے ہونے والے جانی و مالی نقصانات پر گہری ہمدردی اور تشویش کا اظہار کرتے ہوئے اس مشکل وقت میں پاکستان کی امداد کرنے کے عزم کا اعادہ کیا۔
وزیر اعظم نے ایم ڈی آئی ایم ایف کو یقین دلایا کہ پاکستان آئی ایم ایف کے جاری پروگرام کو کامیابی کے ساتھ مکمل کرنے کے لیے پرعزم ہے اور پاکستان کو درپیش چیلنجز کو سمجھنے اور ہمدردی کے لیے ایم ڈی کا شکریہ ادا کیا۔
وزیراعظم نے سیلاب کے نتیجے میں ہونے والی تشویش پر منیجنگ ڈائریکٹر کا شکریہ ادا کیا اور ایم ڈی کو جنیوا میں موسمیاتی لچکدار پاکستان کانفرنس میں شرکت کی دعوت دی۔
جس پر کرسٹالینا جارجیوا نے دعوت کے لیے وزیراعظم پاکستان کا شکریہ ادا کیا اور وضاحت پیش کی کہ جیسا کہ آئی ایم ایف بورڈ کے اجلاس 9 اور 10 جنوری کو پہلے سے طے تھے، وہ صرف عملی طور پر کانفرنس میں شامل ہو سکیں گی۔
