اسلام آباد: مائیکروسافٹ کے بانی اور دنیا کے امیر ترین افراد کی فہرست میں شامل شخصیت بل گیٹس نے پولیو کے خاتمے کے لیے حکومت پاکستان کی کوششوں کو سراہا۔
وزیر اعظم پاکستان کی دعوت پر پاکستان کے دورے پر آئے ہوئے بل گیٹس نے آج جمعرات کو قومی ایمرجنسی آپریشنز سینٹر کا دورہ کیا، انھوں نے اس موقع پر کہا پاکستان نے پولیو کے خلاف تاریخی کامیابی حاصل کی ہے، اس کامیابی کو برقرار رکھتے ہوئے ہم منزل حاصل کر لیں گے۔
دورے کے دوران کوآرڈینیٹر قومی ایمرجنسی آپریشن سینٹر ڈاکٹر شہزاد بیگ نے انھیں بریفنگ بھی دی، اور بل گیٹس کو اب تک کی کامیابیوں اور درپیش چیلنجز سے آگاہ کیا گیا، اس دوران بل گیٹس نے ہیلپ لائن 1166 کا بھی دورہ کیا۔
بل گیٹس کا این سی او سی کا دورہ، کورونا کے خلاف پاکستان کی کامیابیوں کی تعریف
معاون خصوصی ڈاکٹر فیصل سلطان نے بتایا کہ ہم ضلعی سطح پر اپنی ٹیموں کی کارکردگی بہتر بنا رہے ہیں، اور ہم نے انسداد پولیو کے لیے حساس علاقوں پر توجہ مرکوز کی ہوئی ہے، پاکستان جلد پولیو سے پاک ملک بن جائے گا۔
واضح رہے کہ اس سے قبل بل گیٹس نے وزیر اعظم عمران خان سے ملاقات کی تھی، جس میں پولیو کے خاتمے پر بھی بات چیت کی گئی، ملاقات کے دوران وزیر اعظم نے پولیو کے خاتمے کے لیے تعاون پر بل گیٹس سے اظہار تشکر کیا۔
وزیراعظم عمران خان کا پولیو کے خاتمے کیلئے تعاون پر بل گیٹس سے اظہار تشکر
مائیکرو سافٹ کے بانی بل گیٹس کو حکومت پاکستان کی جانب سے ”ہلال پاکستان“ ایوارڈ سے بھی نوازا گیا ہے، بل گیٹس کو صدر مملکت ڈاکٹر عارف علوی نے ہلال پاکستان ایوارڈ دیا۔
