اسلام آباد : پاکستانی سفیر نے مرحوم ارشد شریف کی شناخت کرلی ہے، جس کے بعد میت کی واپسی کیلئے قانونی عمل شروع ہوگیا۔
تفصیلات کے مطابق وزیراطلاعات مریم اورنگزیب کی جانب سے بیان میں کہا گیا ہے کہ پاکستانی سفیرسیدہ ثقلین ، کینیا پولیس حکام اور ڈاکٹرز نیروبی میں اسپتال میں ہیں، پاکستانی سفیر نے مرحوم ارشد شریف کی شناخت کرلی ہے۔
مریم اورنگزیب کا کہنا تھا کہ شناخت کے بعد اب میت کی واپسی کیلئے قانونی عمل شروع ہے، اسوقت ضابطے کی قانونی کارروائی کی جا رہی ہے۔
وفاقی وزیر نے کہا کہ کینیا حکام کو ضابطے کی کارروائی جلد مکمل کرنے کی درخواست کی ہے۔
اس سے قبل وزیر اطلاعات مریم اورنگزیب نے صحافی ارشد شریف کی والدہ سے رابطہ کرکے دلی رنج اور غم کا اظہار کرتے ہوئے معاملے پر پیشرفت اور معلومات سے آگاہ کیا۔
مریم اورنگزیب نے کہا تھا کہ ارشد شریف کی موت پر بہت دکھ ہے،اہلخانہ کے غم میں شریک ہیں، ارشد شریف کی موت کی وجوہات کا پتہ چلانے کیلئے کوششیں جاری ہیں۔
وزیراطلاعات کا کہنا تھا کہ کینیاکی حکومت نے باضابطہ سرکاری طور پرارشد شریف کی موت پر کچھ نہیں بتایا، جیسےہی کینیا کی حکومت بتائے گی ہم تفصیلات سے اہلخانہ اور عوام کو آگاہ کریں گے۔
