ورلڈ امیچر پرو چیمپئن شپ پاور لفٹنگ اینڈ باڈی بلڈنگ مقابلے میں پاکستان کے جواد احمد نے بھارت کے سندیپ سنگھ کو پچھاڑ کر گولڈ میڈل جیت لیا۔
اے آر وائی نیوز کے مطابق دبئی میں ہونے والی ورلڈ امیچر پرو چیمپئن شپ کے پاور لفٹنگ اینڈ باڈی بلڈنگ مقابلے میں پاکستانی تن ساز نے بھارتی حریف کو چاروں شانے چت کر دیا۔
جواد احمد نے سندیپ سنگھ کو پچھاڑ کر گولڈ میڈل حاصل کیا اور ماسٹر کلاس سمیت اوور آل کلاس میں پہلی پوزیشن حاصل کی۔
جواد احمد نے کہا کہ پاکستان کے لیے سونے کا تمغہ جیتنا باعث فخر ہے۔ بھارتی کھلاڑیوں سے پہلی پوزیشن چھیننا سب سے بڑی کامیابی ہے۔
دریں اثنا پاکستان نے چیمپئن شپ میں مجموعی طور پر 9 گولڈ میڈلز، ایک سلور ایک کانسی کا تمغہ جیتا۔
انجم وارثی نے ماسٹر اور اوپن پاور لفٹنگ ایونٹ میں 5 گولڈ اور ایک سلور میڈل پاکستان کے نام کیا۔ انجم وارثی نے ماسٹر ایونٹ کی بینچ پریس، ڈیڈ لفٹ اور اسکواڈ کیٹیگریز میں گولڈ میڈل جیتا۔
پاور لفٹنگ کی اوپن کیٹیگری میں انجم وارثی نے 2 گولڈ اور ایک سلور میڈل حاصل کیا۔
دوسری جانب، سمیر احمد نے جونیئر مینز فزیک میں سب کو پیچھے چھوڑ دیا، سمیر احمد نے مینز فزیک میں گولڈ اور جونیئر باڈی بلڈنگ میں برانز میڈل پاکستان نے نام کیا۔ ماسٹر 40 پلس کیٹیگری میں فرقان رضا نے گولڈ میڈل جیتا۔
