نیویارک: امریکی ریاست نیویارک میں 29 سالہ پاکستانی نوجوان ٹیکسی ڈرائیور کو قتل کرکے لاش کو سڑک پر پھینک دیا گیا۔
امریکی میڈیا کے مطابق نیویارک کے علاقے بروکلین میں 29 سالہ پاکستانی نوجوان ٹیکسی ڈرائیور نعمان سلیمی کو 25 جولائی کی رات کو بہیمانہ اندازمیں قتل کرکے اٹلاٹک اوینو پر مردہ حالت میں پھینک دیا گیا۔
رپورٹ کے مطابق قاتل مقتول نعمان سلیمی کی ٹیکسی لے کر فرار ہونے میں کامیاب ہوگیا۔
[bs-quote quote=”بھائی کی شادی کو تین سے چار ماہ ہی گزرے تھے” style=”style-8″ align=”left” author_name=”سلیم سلیمی”][/bs-quote]
نیویارک اسٹیٹ فیڈریشن آف ٹیکسی ڈرائیورز کے ترجمان کا کہنا ہے کہ ریزارٹ، کسینو بروکلین سے نعمان سلیمی نے سواری اٹھائی تھی جبکہ وہ ٹیکسی چلانا چھوڑ کر فارمیسی کمپنی جوائن کرنے جارہا تھا۔
مقتول کے بھائی سلیم سلیمی کا کہنا ہے کہ بھائی کے قتل کا سن کر یقین نہیں ہوا یہ ہماری فیملی کے لیے بہت بڑا نقصان ہے، بھائی کی شادی کو تین سے چار ماہ ہی گزرے تھے۔
رپورٹ کے مطابق بروکلین اسٹریٹ پر چھینا جھپٹی کی وارداتوں میں اضافہ ہوا ہے اور پولیس کی جانب سے نفری بڑھا دی گئی ہے اور پولیس ملزم کی تلاش میں چھاپے مار رہی ہے۔
نیویارک پولیس حکام نے اعلان کیا ہے کہ قاتل سے متعلق کوئی بھی معلومات دینے پر اس شخص کو 5 ہزار امریکی ڈالر کی انعامی رقم دی جائے گی۔
