کراچی: سال 2024 پاکستانی شوبز انڈسٹری میں شادیوں کے حوالے سے منفرد سال رہا، اس سال متعدد مشہور شخصیات کی شادیاں ہوئیں، جن کی پر وقار تقریبات نے نہ صرف مداحوں کو متاثر کیا بلکہ سوشل میڈیا پر بھی مقبول ہوئیں۔
2024 کے دوران شادی کے بندھن میں بندھنے والی معروف شوبز کی شخصیات:
اداکارہ ثنا جاوید نے جنوری 2024 میں کرکٹر شعیب ملک سے شادی کا اعلان کیا۔ ان کی خفیہ شادی مداحوں کے لیے حیرانی کا باعث بنی، اور اس کے بعد ان کی شادی سوشل میڈیا پر بھرپور بحث کا موضوع بن گئی۔
اداکارہ مدیحہ رضوی نے اپریل 2024 میں جنید علی پرویز سے دوسری شادی کی۔ ان کی پہلی شادی حسن نعمان سے ہوئی تھی، جس سے ان کی دو بیٹیاں ہیں۔ مدیحہ نے اپنے نئے سفر کا اعلان فیس بک پر ایک خوبصورت نکاح تصویر کے ساتھ کیا۔
فیروز خان نے جون 2024 میں ڈاکٹر زینب سے اپنی دوسری شادی کا اعلان کیا۔ یہ تقریب خاندان کے قریبی افراد کے درمیان منعقد ہوئی، اور فیروز نے اپنی بیوی کے ساتھ ایک دلکش تصویر سوشل میڈیا پر شیئر کی۔
انوشے اشرف نے جون 2024 میں اپنے قریبی دوست شہاب رضا مرزا سے نکاح کیا۔ ان کی شادی کی خاص بات یہ تھی کہ نکاح کی تقریب ویڈیو لنک کے ذریعے منعقد کی گئی، جس سے دنیا بھر کے عزیز و اقارب اس خوشی میں شریک ہو سکے۔
جویریہ عباسی نے رمضان کے مہینے میں عدیل حیدر سے نکاح کیا اور ستمبر 2024 میں باضابطہ اعلان کیا۔ یہ ان کی دوسری شادی ہے؛ ان کی پہلی شادی اداکار شمعون عباسی سے ہوئی تھی۔
معروف گلوکار عمیر جسوال نے اکتوبر 2024 میں اپنی دوسری شادی کا اعلان کیا۔ ان کی نکاح کی تصویر اور اس کے ساتھ قرآنی آیت نے ان کے مداحوں کو خوب متاثر کیا۔
یوٹیوبر رجب بٹ نے دسمبر 2024 میں ایمان سے شادی کی۔ ان کی شادی کی رنگا رنگ تقریبات، لاہور میں ڈھولکی سے شروع ہو کر، سوشل میڈیا پر خاصی مقبول ہوئیں۔
شہریار منور نے ماہین صدیقی کے ساتھ ایک نجی نکاح تقریب میں شادی کی۔ ان کی تصاویر اور ویڈیوز نے مداحوں کو ان لمحات کا حصہ بنایا، اور ان کے لباس کی خوبصورتی نے تقریب کو مزید شاندار بنا دیا۔
ایمن سلیم کی شادی 2023 کے آخر میں کامران ملک سے ہوئی، لیکن ان کی ریسیپشن یکم جنوری 2024 کو ہوئی۔ ان کی شادی کی تقاریب میں ان کے دلکش لباس اور اسٹائل نے مداحوں کو خوب متاثر کیا۔
