نیویارک : پاکستانی سفارتی مشن نیویارک کا دورہ مکمل واشنگٹن روانہ ہوگیا ، جہاں وفد اعلیٰ امریکی حکام سے ملاقات میں پاکستان کا موقف بیان کرے گا۔
تفصیلات کے مطابق بلاول بھٹو زرداری کی سربراہی میں پاکستانی سفارتی مشن نیویارک کا دورہ مکمل کرکے واشنگٹن روانہ ہوگیا، پاکستانی مشن ٹرین سروس کےذریعے روانہ ہوا۔
پاکستانی سفارتی وفد امریکی وقت کے مطابق رات گئے واشنگٹن پہنچ جائے گا ،9 رکنی وفد میں سینئر پارلیمینٹرین و دیگر سفارتی عملہ شامل ہے۔
وفد آج سے واشنگٹن میں سفارتی سطح پرمیٹنگ کا آغاز کرے گا، جس میں اعلیٰ امریکی حکام سے ملاقات میں پاکستان کا موقف بیان کرے گا۔
اس سے قبل پاکستانی سفارتی مشن نے بھرپورانداز میں پاکستان کا مقدمہ اقوام متحدہ و دیگر کے سامنے پیش کیا، بلاول بھٹو نے اسٹوڈنٹ اور پاکستانی کمیونٹی سے لیکر تمام اسٹیک ہولڈرز سے ملاقات کیں۔
وفد نے دنیا بھر کے اقوام متحدہ مستقل و غیر مستقل مندوب سے ملاقاتیں کیں۔
نیویارک کے پاکستان مشن کے سربراہ بلاول بھٹو نے پریس کانفرنس میں کہا تھا کہ بھارت پاکستان میں دہشت گردوں کی سہولت کاری کررہا ہے، جس کے ثبوت موجود ہیں، ہر ذمہ دارملک امن کیلئے کردار ادا کرے۔
پاکستان اوربھارت کی جنگ میں سب کا نقصان ہے، دنیا میں امن کا ہرایک کو فائدہ ہے،اندرونی سطح پردہشت گردی کے خلاف پاکستان نے کامیابی سمیٹی لیکن بھارت سندھ طاس معاہدے کی خلاف ورزی کررہا ہے۔
