اسلام آباد: اتر پردیش کے انتخابات میں بھارتیہ جنتا پارٹی کی فتح کے بعد پاکستانی لڑکی نے بھارتی وزیر اعظم نریندر مودی کے نام خط لکھ ڈالا ، جس میں مودی امن کی دعوت دیتے ہوئے دونوں ملکوں کی حکومتوں کو گولیوں کی جگہ کتابیں خریدنے کا مشورہ دے دیا۔
تفصیلات کے مطابق 11 سالہ پاکستانی لڑکی عقیدت نوید نے بھارتی وزیر اعظم نریندر مودی کو انتخابات میں تاریخی فتح پر مبارک باد دیتے ہوئے کہا کہ بھارتی وزیر اعظم کو دونوں ممالک کے درمیان امن کا پل بنانے پر توجہ دینی چاہیے۔
عقیدت نوید نے نریندر مودی کے نام خط میں کہا کہ مستقبل میں کامیابیاں چاہتے ہیں تو امن کے لئے کام کریں، اچھے تعلقات سے پاکستان اور بھارت دونوں کو فائدہ ہو گا۔
عقیدت نے مودی کو مخاطب کرتے ہوئے کہا کہ میرے والد نے مجھے بتایا کہ دلوں کو جیتنا ایک شاندار کام ہے اور شاید آپ نے بھارتی عوام کا دل جیت لیا ہے اس وجہ سے آپ اترپردیش انتخاب جیت گئے ، لیکن اگر آپ اور زیادہ بھارتیوں اور پاکستانیوں کا دل جیتنا چاہتے ہیں تو آپ کو دوستی اور امن کی جانب قدم اٹھانا چاہیے، دونوں ممالک کے درمیان اچھے تعلقات کی ضرورت ہے۔
مزید پڑھیں : کشمیرمیں مظالم : بھارتی طالبہ مودی سرکار پر برس پڑی
پاکستانی لڑکی نے کہا کہ آئیں مل کر پاکستان اور بھارت کے درمیان امن کا پل بنیں اور فیصلہ کریں کہ ہم گولیاں نہیں کتابیں خریدیں گے، ہم بندوقیں نہیں غریب عوام کیلئے ادویات خریدیں گے۔
خیال رہے کہ عقیدت نوید لاہور کی رہائشی ہیں اور 5 ویں جماعت میں پڑھتی ہیں اور نیشنل کالج آف آرٹس میں اسسٹنٹ پروفیسر کی بیٹی ہے۔
عقیدت کا 14 سالہ بھائی بھی چیف آف آرمی سٹاف جنرل قمر جاوید باجوہ کے نام خط لکھ چکا ہے ، جس میں آرمی چیف کو دہشت گردوں کیخلاف آپریشن ردالفساد شروع کرنے پر مبارکباد دی تھی۔
اس سے قبل بھی عقیدت نوید بھارتی وزیر خارجہ سشما سوراج اور اسلام آباد میں بھارتی سفیر کو بھی خط لکھ چکی ہیں جبکہ بھارتی حکام کی جانب سے عقید ت کو کارڈز بھی موصول ہو چکے ہیں۔
