فلمی دنیا کے نام وَر موسیقار مصلح الدّین 7 اگست 2003 کو وفات پاگئے تھے۔ آج ان کی برسی منائی جارہی ہے۔
پاکستانی موسیقار مصلح الدّین 1938 میں کلکتہ میں پیدا ہوئے تھے۔ انھوں نے ڈھاکا یونیورسٹی سے ایم اے کیا اور پاکستان چلے آئے اور لاہور شہر میں فلمی صنعت کے لیے موسیقار کی حیثیت سے اپنا سفر شروع کیا۔ یہاں ان کی ملاقات ہدایت کار لقمان سے ہوئی جنھیں مصلح الدّین نے اپنی بنائی ہوئی دھنیں سنائیں تو انھوں نے فلم ’’آدمی‘‘ کی موسیقی ترتیب دینے کی پیشکش کی۔ یوں ان کا فلم انڈسٹری میں بطور موسیقار یہ پہلا قدم تھا۔ یہ فلم کام یاب رہی اور مصلح الدّین کی دھنوں نے بھی فلم سازوں کو اپنی جانب متوجہ کرلیا جس کے بعد انھیں فلم راہ گزر، ہم سفر، زمانہ کیا کہے گا، دال میں کالا، دل نے تجھے مان لیا، جوکر، جوش، جان پہچان کی موسیقی ترتیب دینے کا موقع ملا اور ان کی کام یابی کا سفر جاری رہا۔
فلم ہم سفر کے لیے بہترین موسیقی ترتیب دینے پر مصلح الدین کو نگار ایوارڈ بھی دیا گیا۔
مصلح الدین نے مغربی اور عربی موسیقی سے خوب استفادہ کیا، لیکن ان میں بنگالی طرز کی چاشنی شامل کرکے اسے انفرادیت عطا کردیتے تھے اور یہ ان کی بڑی مہارت اور اپنے فن میں کمال تھا۔
