اسلام آباد : پاکستانی روپے کو ایشیا کی کمزور ترین کرنسی قرار دے دیا گیا، بلوم برگ نے کہا کہ پاکستانی کرنسی ڈالر کے مقابلے میں بنگلادیش اور ڈیفالٹ ملک سری لنکا سے بھی پیچھے رہ گئی ہے۔
تفصیلات کے مطابق بلومبرگ نے پاکستانی روپے کی قدر میں بڑی کمی کے حوالے سے رپورٹ جاری کردی۔
جس میں کہا گیا کہ ن لیگ اور اتحادیوں کی حکومت کے ایک سال میں روپے کی قدر خطے میں سب سے پست رہی ، امریکی ڈالر نے پورے خطے میں سب زیادہ پاکستانی روپے کو پچھاڑا۔
بلومبرگ کا کہنا تھا کہ ایشیائی خطے میں ڈالر کے مقابلے میں پاکستانی کرنسی میں ریکارڈ گراوٹ دیکھی گئی ایک سال میں ڈالر کے مقابلے میں پاکستانی کرنسی 36.4فیصد گری۔
رپورٹ میں بتایا گیا کہ ڈالر کے مقابلے میں پاکستانی کرنسی بنگلہ دیش ، سری لنکا سے بھی پیچھے ہے، پاکستانی کرنسی سے ویتنام، تائیوان، انڈونیشیا کی کرنسی بہتر پوزیشن پر رہی۔
رپورٹ کے مطابق پاکستانی روپے کےمقابلے میں ملائیشیا اوربھارت کی کرنسی بھی بہتر پوزیشن پر رہی، رواں مالی سال پاکستانی کرنسی ڈالر کے مقابلے میں 21.1 فیصدکم ہوئی۔
بلومبرگ نے کہا کہ بھارت کا روپیہ ڈالر کے مقابلے میں ایک سال میں 4.4 فیصد گرا جبکہ بھارت کاروپیہ رواں مالی سال 2023 میں 2.4فیصد بہتر بھی ہوا۔
اسی طرح ویتنامی کرنسی میں ایک سال میں 2.5فیصد کمی اور رواں مالی سال 0.8 فیصد بہتری ریکارڈ کی گئی جبکہ امریکی ڈالر کے سامنے بنگلہ دیشی کرنسی 18.9 فیصد اور رواں مالی سال 3 فیصد کم ہوئی۔
ایک سال میں انڈونیشیا کی کرنسی 3.6 فیصد گری اور 4.5 فیصد بہتر ہوئی ، تائیوان کی کرنسی ایک سال میں 4.5 فیصد کم اور رواں مالی سال 23میں 0.9فیصد بہتر ہوئی جبکہ ملائیشیا کی کرنسی ایک سال میں 4فیصد اور رواں مالی سال 23 میں 0.1 فیصد کم ہوئی۔
رپورٹ میں کہا گیا ڈیفالٹ کے باوجود سری لنکن کرنسی میں ڈالر کے مقابلے میں رواں مالی سال 15.2 فیصد رہی۔
