اسلام آباد: بلوچستان لبریشن فرنٹ (بی ایل ایف) کے ٹھکانوں پر پاکستانی اسٹرائیک میں ہلاک دہشت گردوں کی ابتدائی تفصیلات سامنے آ گئی ہیں۔
تفصیلات کے مطابق دہشت گردی میں ملوث بی ایل ایف کے خفیہ ٹھکانوں پر ایران میں کامیاب اسٹرائیکس کی گئی تھیں، ان اسٹرائیکس کے دوران ہلاک دہشت گردوں میں دوستہ عرف چیئرمین، ساحل عرف شفق، محمد وزیر عرف وازو، سرور ولد اصغر، اور بجر عرف سوغات شامل تھے۔
پنجگور کا رہائشی ہلاک دہشت گرد دوستہ عرف چیئرمین نے 2013 میں بی ایل ایف میں شمولیت اختیار کی تھی، اور وہ بی ایل ایف کے کمانڈر فضل شیر عرف طاہر گروپ کا رکن تھا، وہ پروم سیکٹر میں سیکیورٹی اداروں پر متعدد حملوں میں ملوث رہا۔
دوستہ عرف چیئرمین زامران سیکٹر میں منشیات فروشی اور لوٹ مار میں بھی ملوث تھا، 20 ستمبر 2019 کو پروم میں اسکول اور ایف سی پوسٹ پر حملے، 23 مئی 2020 کو پروم میں ایف سی پوسٹ پر حملے، 4 ستمبر 2022 کو یوسف پوسٹ پر بارودی سرنگ دھماکے میں، 19 جنوری 2023 کو اخلاق عرف شوکت ولد کلری گچیک کے اغوا اور قتل میں ملوث تھا، اس نے 12 اپریل 2023 کو ایف سی کے قافلے کو بھی نشانہ بنایا تھا۔
ہلاک دہشت گردوں کے ساتھ اصغر عرف بشام کا بیٹا سرور بھی شامل ہے، جو پنجگور کا رہائشی تھا، 8 جون 2021 کو اصغر عرف بشام نے ایف سی پٹرولنگ پارٹی پر حملہ کیا، 20 جولائی 2021 کو پنچگور میں ایف سی پٹرولنگ پارٹی پر فائرنگ کی، فروری 2023 میں پنچگور کے بس اسٹینڈ پر فائرنگ کر کے محمد انصر کو شہید کیا، 21 نومبر 2023 کو اس کی فائرنگ سے ایک سپاہی نے جام شہادت نوش کیا۔
دہشت گرد محمد وزیر نے ابتدائی طور پر 2014 میں بی آر اے میں 2019 میں بی ایل ایف میں شمولیت کی، وزیر عرف وازو بی ایل ایف کے دہشت گرد عابد عرف چاکر کا بھائی تھا، وہ پروم، گوارگو، پنجگور میں دہشت گرد حملوں میں ملوث تھا، محمد وزیر عرف وازو نے 14 ستمبر 2020 کو پنجگور کے احمد اللہ ولد بشیر اور عامر ولد محمد حنیف کو شہید کیا۔
ہلاک دہشت گرد وزیر اور بجر نے 4 مارچ 2023 کو پل ناکہ پوسٹ پر دستی بم حملہ کیا، یکم مئی 2023 کو کسٹم آفس ایریا کے قریب ایف سی کے قافلے کو بارودی سرنگ کا نشانہ بنایا، بجرعرف سوغات 2016 سے پروم میں دہشت گرد حملوں میں ملوث تھا، اس نے 7 مارچ 2023 کو نذیر ولد بہرام کو اغوا اور شہید کیا، ہلاک دہشت گرد ساحل لنگ عرف شفق بھی معصوم شہریوں اور فورسز کے خلاف حملوں میں ملوث رہا، ساحل لنگ دہشت گرد بلبل کا بھائی اور مارگٹ، ہرنائی میں دہشت گردی کی کارروائیوں میں ملوث تھا۔
