کوئٹہ: پاکستان کے پسماندہ صوبے بلوچستان کے شہری نے دونوں ہاتھوں سے محروم ہونے کے باوجود اپنی دنیا آپ تعمیر کرنے کا تہیہ کررکھا ہے‘ امیر عالم نامی یہ شخص ٹیکسی ڈرائیور ہے۔
تفصیلات کے مطابق پاکستان کے جنوب مغربی صوبہ بلوچستان کے صدر مقام کوئٹہ سے تعلق رکھنے والے امیر عالم دونوں بازوؤں سے محروم ہونے کے باوجود پاؤں سے گاڑی چلانےکے ساتھ ساتھ گاڑی کے وہیل بھی پاؤں سے ہی تبدیل کر لیتے ہیں۔
غریب گھرانے سے تعلق رکھنے والے قلعہ سیف اﷲ کے رہائشی 32 سالہ امیر عالم کے دونوں ہاتھ بچپن میں کرنٹ لگنے سے بُری طرح جھلس گئے تھے جنہیں مجبوری کے تحت کاٹنا پڑا، مگر امیر عالم نے ہمت نہ ہاری، محنت جاری رکھی اورآج اپنی مدد آپ کے تحت پاؤں سے ٹیکسی چلا کراپنا رزق خود کما رہے ہیں۔
رونالڈو کے لیے معذورایرانی مداح کا انوکھا تحفہ*
اگر گاڑی کا ٹائر پنکچر ہوجائے تو وہ اس کے لیے بھی کسی کی مدد لینے کے روادار نہیں بلکہ اسے تبدیل بھی خود ہی کرتے ہیں، اسی طرح وہ فون بھی پاؤں کی مدد سے اور کندھے سے لگا کر سنتے ہیں۔ انکا کہنا ہے کہ وہ معاشرے میں کسی پر بوجھ نہیں بننا چاہتے اسی لئے محنت کرکے کما رہے ہیں۔
امیر عالم اور ان ہی کی طرح دنیا میں بہت سے باہمت افراد ایسے ہیں کہ جو زندگی میں پیش آنے والی معذوری کے باوجود کسی پر بوجھ بننے کے بجائے بہت سے تندرست مگر کاہل افراد کے لئے روشن مثال بن جاتے ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
