ورلڈکپ کےلئے قومی اسکواڈ کے بھارتی ویزوں میں تاخیر پر پاکستان کرکٹ بورڈ نے آئی سی سی کو احتجاجی خط لکھ دیا۔
خط میں پی سی بی نے کہا ہے کہ ورلڈکرکٹ میگا ایونٹ کیلئے ویزے جاری کرانا آئی سی سی کی ذمہ داری ہے ٹیم روانگی کے شیڈول میں ویزوں کے عدم اجرا کے باعث پہلے ہی 2روز کی تاخیر ہو چکی ہے۔
خط میں کہا گیا ہے کہ پاکستان ٹیم اسکواڈ نے ایک روز بعد بھارت روانہ ہونا ہے مگر تاحال ویزوں کا اجرا نہیں ہو سکا۔
کرکٹ ورلڈکپ کیلئے پاکستان کو تاحال ویزے جاری نہیں کیے۔ پاکستان کے سوا تمام ٹیموں کو ویزے جاری ہو چکے ہیں۔ بھارت نے کھلاڑیوں اور آفیشلز کے ویزے سیکیورٹی کلیئرنس سے مشروط کردیے ہیں۔
آسٹریلیا کے بعد جنوبی افریقہ کی ٹیم بھی بھارت پہنچ چکی ہے۔ پاکستان حیدرآباد دکن میں نیوزی لینڈ اور آسٹریلیا کے خلاف وارم اپ میچز کھیلے گا۔
کرکٹ کا سب سے بڑا میلہ آئندہ ماہ 5 اکتوبر سے بھارت میں شروع ہو رہا ہے۔ میگا ایونٹ کے لیے بابر اعظم کی قیادت میں 15 رکنی اسکواڈ کا اعلان کیا جا چکا ہے جب کہ تین کھلاڑی ریزرو کے طور رکھے گئے ہیں۔ تاہم اسکواڈ کے صرف دو کھلاڑی ہی بھارت کے دورے اور ایک وہاں کھیلنے کا تجربہ رکھتے ہیں۔
کشیدہ حالات اور سیاسی وجوہات کی بنا پر روایتی حریف پاکستان اور بھارت سوائے آئی سی سی یا ایشین کرکٹ کونسل کے ایونٹ کے علاوہ 15 سال سے کوئی باہمی ٹیسٹ سیریز نہیں کھیلے ہیں جب کہ ون ڈے اور ٹی ٹوئنٹی کی آخری سیریز بھی 2012-13 میں بھارتی سر زمیں پر کھیلی گئی تھی۔ جس کے باعث قومی ٹیم کے کپتان بابر اعظم سمیت 15 رکنی اسکواڈ کے 13 کھلاڑی بھارت کا دورہ ہی نہیں کر سکے ہیں۔
