راولپنڈی : آرمی چیف جنرل عاصم منیر نے اسرائیلی فوج کے ہاتھوں معصوم شہریوں کی شہادت پر شدید تشویش کا اظہار کرتے ہوئے غزہ میں فوری جنگ بندی سمیت انسانی ہمدردی کی بنیادوں پر راہداری کھولنے کا مطالبہ کردیا۔
تفصیلات کے مطابق آئی ایس پی آر کی جانب سے بیان میں کہا گیا ہے کہ آرمی چیف جنرل سید عاصم منیر سے پاکستان میں فلسطین کے سفیر احمد جواد ربیع نے جی ایچ کیو راولپنڈی میں ملاقات کی، جس کے دوران آرمی چیف نے غزہ میں جاری جنگ میں فلسطینیوں کی جانوں کے نقصان پر تعزیت کا اظہار کیا۔
آرمی چیف نے جنگ میں اسرائیلی ڈیفنس فورسز کے ہاتھوں جان بوجھ کر بے گناہ شہریوں کے اندھا دھند قتل پر گہری تشویش کا اظہار کرتے ہوئے کہا کہ شہری آبادی، اسکولوں، یونیورسٹیوں، امدادی کارکنوں، اسپتالوں پر مسلسل حملے اور غزہ سے فلسطینیوں کی جبری بے دخلی انسانیت کے خلاف سنگین جرائم ہیں۔
جنرل سید عاصم منیر نے فوری جنگ بندی سمیت غزہ کے لئے انسانی ہمدردی کی بنیادوں پر راہداری کھولنے، شہریوں کے تحفظ اور بین الاقوامی انسانی قانون کی پاسداری کا بھی مطالبہ کیا۔
آرمی چیف نے دو ٹوک الفاظ میں واضح کیا کہ وہ پاکستان کے 1967 سے پہلے کی سرحدوں کی بنیاد پر قائم آزاد فلسطینی ریاست کے اصولی موقف کی حمایت کا اعادہ کرتے ہیں، جس کا دارالحکومت القدس الشریف ہے۔
ان کا کہنا تھا کہ پاکستان کا ماننا ہے کہ غزہ میں تشدد کی تازہ لہر بلا روک ٹوک جبر، انسانی حقوق کی مسلسل خلاف ورزیوں اور ریاستی سرپرستی میں مسجد اقصیٰ کی بے حرمتی کا نتیجہ ہے، اس جنگ کو دہشت گردی سے جوڑنا نادانی ہوگی، یہ کئی دہائیوں پر محیط مسلسل وحشیانہ جبر کا نتیجہ ہے۔
جنرل عاصم منیر نے مزید کہا کہ اس نازک موڑ پر بین الاقوامی برادری اسرائیلی ڈیفنس فورسز کی طرف سے طاقت کے غیر ضروری اور غیر قانونی استعمال کی وجہ سے رونما ہونے والے انسانی المیے کو جلد از جلد ختم کرنے کے لئے اپنا کردار ادا کرے اور اسرائیلی فورسز کی انسانی قوانین کی صریح خلاف ورزی اور مظالم کو جاری رکھنے کی حوصلہ افزائی کرنے سے باز رہے، کیونکہ یہ تہذیب اور انسانی طرز عمل کے تمام اصولوں کے منافی ہیں۔
