فلسطینی وزیر اعظم نے اقوام متحدہ میں حمایت پر فرانس کا شکریہ ادا کیا ہے۔
الجزیرہ کے مطابق اس ہفتے کے شروع میں اقوام متحدہ کی سلامتی کونسل میں فلسطین کی یو این رکنیت کے لیے ووٹنگ کے بعد فلسطینی وزیر اعظم محمد مصطفیٰ نے فرانس کے وزیر خارجہ سے فون پر بات کی ہے۔
فلسطینی خبر رساں ادارے وفا کے مطابق محمد مصطفیٰ نے اقوام متحدہ میں فلسطینیوں کی مکمل رکنیت کے حق میں فرانس کے ’اصولی‘ ووٹ دینے پر وزیر خارجہ اسٹیفن سییُغنے کا شکریہ ادا کیا۔
غزہ: ہر 10 منٹ میں ایک بچہ جاں بحق یا زخمی ہوا
خیال رہے کہ امریکا نے اس قرارداد کو ویٹو کر دیا تھا جس کی وجہ سے قرارداد ناکام ہو گئی تھی۔ فلسطینی وزیر اعظم نے کہا کہ اب وقت آ گیا ہے کہ فلسطین دنیا کے ممالک میں اپنا صحیح مقام حاصل کرے۔
فون پر ہونے والے رابطے میں دونوں وزرا نے دو طرفہ تعلقات کو فروغ دینے اور غزہ میں ’انسانی تباہی‘ کے دوران فلسطینی حکومت کی اضافی مدد کی ضرورت پر بھی بات کی۔
واضح رہے کہ 8 اپریل کو اقوام متحدہ میں فلسطین کی مستقل رکنیت کی قرارداد کو امریکا نے ویٹو کر دیا تھا، جب کہ سیکیورٹی کونسل کے 12 رکن ممالک نے فلسطین کو مستقل رکنیت دینے کی حمایت کی تھی۔ برطانیہ اور سوئٹزرلینڈ نے قرارداد پر ووٹنگ سے گریز کیا تھا، 7 اکتوبر کے بعد سے امریکا نے اسرائیل کی حمایت میں چوتھی بار ویٹو کا استعمال کیا، خیال رہے کہ فلسطین کو 2012 سے اقوام متحدہ میں غیر رکن مبصر کا درجہ حاصل ہے۔
