ترجمان دفتر خارجہ کا کہنا ہے کہ پاکستان ایک ایسی فلسطینی ریاست کے قیام کا خواہاں ہے جس کا دارالحکومت القدس الشریف ہو۔
دفتر خارجہ کی جانب سے نائب وزیراعظم اور وزیر خارجہ اسحاق ڈار اور ایرانی وزیر خارجہ سید عباس عراقچی کے درمیان ٹیلفونک رابطے سے متعلق بیان جاری کیا گیا ہے۔
ترجمان دفتر خارجہ شفقت علی خان کے مطابق نائب وزیراعظم اسحاق ڈار اور وزیر خارجہ سے آج ایران کے وزیر خارجہ سید عباس عراقچی نے فون پر رابطہ کیا۔ دونوں وزرا نے مشرق وسطیٰ کی صورتحال پر خصوصی توجہ مرکوز کی اور غزہ میں فلسطینیوں کی مسلسل حالت زار پر تبادلہ خیال کیا۔
ترجمان کے مطابق نائب وزیراعظم اسحاق ڈار نے غزہ کے لوگوں کو بے گھر کرنے کی تجویز کو انتہائی پریشان کن اور غیر منصفانہ قرار دیا اور کہا کہ فلسطین کی سر زمین صرف فلسطینی عوام کی ہے۔
ان کا کہنا تھا کہ اقوام متحدہ سلامتی کونسل کی قراردادوں کے مطابق اس مسئلے کا دو ریاستی حل ہی واحد قابل عمل اور منصفانہ آپشن ہے۔ پاکستان 1967 سے پہلے کی سرحدوں پر مبنی خودمختار، متصل فلسطینی ریاست کے قیام کی حمایت جاری رکھے گا۔
اسحاق ڈار نے اس موقف کا اعادہ کیا کہ پاکستان ایک ایسی فلسطینی ریاست کے قیام کا خواہاں ہے، جس کا دارالحکومت القدس الشریف ہو۔
ترجمان کا مزید کہنا تھا کہ اسحاق ڈار نے ایرانی وزیر خارجہ کو او آئی سی وزرائے خارجہ کا غیر معمولی اجلاس بلانے کے لیے پاکستان کی حمایت سے بھی آگاہ کیا جب کہ فریقین نے آنے والے دنوں میں پیش رفت پر قریبی روابط برقرار رکھنے پر اتفاق کیا گیا۔
