اسلام آباد : پاناما لیکس کی تحقیقات کیلئے ٹی او آرز کی تیاری کی غرض سے قائم پارلیمانی کمیٹی کیلئے حکومت نے چھ ناموں کی منظوری دےدی، اسحاق ڈار،حاصل بزنجو بھی کمیٹی میں شامل ہیں۔
ترجمان قومی اسمبلی کے مطابق اسپیکرسردار ایاز صادق نے پارلیمانی کمیٹی کااجلاس پچیس مئی کو طلب کرلیا ہے۔
تفصیلات کے مطابق وزیراعظم نواز شریف نے پانامہ لیکس کے ٹی او آرز کے تعین کیلئے پارلیمانی کمیٹی کے حکومتی ارکان کے ناموں کی منظوری دے دی ہے۔
حکومت کی جانب سے پارلیمانی کمیٹی میں اسحاق ڈار،خواجہ آصف ،سعدرفیق ،اکرم خان درانی، میرحاصل خان بزنجو اورانوشہ رحمان کو نمائندگی دی گئی ہے۔
سرکاری ٹی وی نے اعلان کیا کہ اسپیکر قومی اسمبلی نے پارلیمانی کمیٹی کیلئے حکومتی ارکان کا نوٹی فکیشن جاری کردیاہے ۔تاہم اسمبلی سیکریٹریٹ ذرائع نے اس کی تردید کردی۔
اسمبلی سیکریٹریٹ کے مطابق پانامالیکس کی تحقیقات کیلئے ٹی اوآرکمیٹی کا نوٹی فکیشن جاری نہیں ہوا، حکومت اوراپوزیشن کےتمام باضابطہ نام موصول ہونے پرنوٹی فکیشن جاری ہوگا۔
یاد رہے کہ وزیراعظم کے قومی اسمبلی میں خطاب کے بعد ٹی او آرز کی تیاری کیلئے پارلیمانی کمیٹی بنانے کا اعلان کیا گیا تھا۔
اپوزیشن کی جانب سے کمیٹی میں ایم کیو ایم کے بیرسٹر سیف کو شامل کیا گیاہے۔ اپوزیشن کے ارکان کےنام موجود ہونے کے باوجود نوٹیفکیشن میں تاخیر بھی وجہ سمجھ سے باہر ہے۔
0
20
