بالی وڈ کی معروف اداکارہ پرینیتی چوپڑا ور بھارتی سیاستدان راگھو چڈھا اپنی شادی کے بعد خبروں کی زینت بنے ہوئے ہیں۔ ان کی شادی سے متعلق اب ایک حیرت انگیز خبر سامنے آئی ہے۔
رپورٹس کے مطابق 24 ستمبر کو ادے پور کے لیلا پیلس میں شریک سفر کے طور پر ایک دوسرے کا ہاتھ تھامنے والے پرینیتی اور راگھو نے اپنی شادی خانہ آبادی میں آنے والے مہمانوں سے کسی طرح کا تحفہ قبول نہیں کیا۔
بارات میں ‘ملنی‘ کی رسم کے لیے بھی صرف 11 روپے کی معمولی رقم لی گئی، ’ملنی‘ ہندؤں کی ایک رسم ہے جس میں لڑکی کی فیملی دولہے اور اس کے خاندان کا استقبال کرتے ہوئے انھیں بطور محبت رقم ادا کرتی ہے۔
بھارتی فلمی ویب سائٹس کی ایک رپورٹ میں انکشاف کیا گیا کہ پرینیتی اور راگھو کے خاندان کے مابین بھی کسی قسم کے تحائف کا تبادلہ نہیں کیا گیا۔ اس کے علاوہ تقریب میں آنے والے مہمانوں سے بھی کوئی تحفہ نہیں لیا گیا۔
پرینکا چوپڑا کی والدہ نے میڈیا سے گفتگو کرتے ہوئے بتایا کہ پرینیتی کی شادی میں کوئی تحفہ لینے سے انکاد کردیا گیا، انھوں نے کہا کہ ’بہت بڑھیا، انھوں نے منع کردیا، کوئی لینا دینا نہیں، بس آشرواد (دعا) چاہیے۔‘
واضح رہے کہ شادی سے قبل کی تقریبات سے لے کر شادی کے بندھن میں بندھنے کے بعد میڈیا کے سامنے آنے تک جوڑے کی متعدد تصاویر سوشل میڈیا پر وائرل ہوئیں جس میں دونوں کافی خوش نظر آرہے ہیں۔
