اسلام آباد: چوہدری پرویز الہٰی کی سی ٹی اسکین رپورٹ ڈاکٹرز کو موصول ہو گئی ہے، ان کی کئی پسلیوں میں فریکچر ہے۔
اسپتال ذرائع کے مطابق سابق وزیر اعلیٰ پنجاب چودھری پرویز الہٰی کا پمز اسپتال میں علاج جاری ہے، ڈاکٹروں نے ان کو دو تین روز زیرعلاج رکھنے کا فیصلہ کیا ہے، تاہم ان کے لیے خصوصی میڈیکل بورڈ تشکیل نہیں دیا گیا، کارڈیک، جنرل سرجری اور پلمونولوجی کے ڈاکٹروں نے پرویز الہٰی کا معائنہ کیا۔
ذرائع نے کہا چوہدری پرویز الہٰی کی مجموعی صحت تسلی بخش قرار دی گئی ہے، سی ٹی اسکین رپورٹ ڈاکٹرز کو موصول ہو گئی، جس میں پسلیوں کے فریکچر کی تصدیق ہوئی ہے، چوہدری پرویز الہٰی کی دو تین پسلیوں میں فریکچر ہے۔
چوہدری پرویز الہٰی واش روم میں گر کر زخمی ہو گئے
پرویز الہٰی کو پسلیوں اور کمر میں درد کی شکایت ہے، ڈاکٹروں نے جاری ادویات میں معمولی رد و بدل کر دی ہے، اور بعض نئی دافع درد ادویات تجویز کی ہیں، ان کا کہنا ہے کہ پسلیوں کے فریکچر کے لیے سرجری کی ضرورت نہیں ہے، فریکچر از خود ٹھیک ہو جائے گا۔
اسپتال ذرائع کا کہنا ہے کہ چوہدری پرویز الہٰی کو شدید نقاہت ہو رہی ہے، اس لیے ڈاکٹروں نے ان کو مکمل بیڈ ریسٹ کی ہدایت کی ہے۔
