اسلام آباد: پاسکو واجبات کی ادائیگی نہ ہونے پر صوبوں کو گندم فروخت نہیں ہوگی، وزارت غذائی تحفظ نے ہدایت جاری کر دی۔
تفصیلات کے مطابق وزارت غذائی تحفظ کا کہنا ہے کہ صوبوں کے ذمہ پاسکو واجبات 149 ارب روپے تک پہنچ گئے ہیں، اس لیے صوبوں کو پاسکو سے گندم کی خریداری کے لیے بقایا جات کلیئر کرنے کی ہدایت کر دی گئی ہے، ادائیگیاں نہ کی گئیں تو گندم خریداری کا معاہدہ نہیں ہوگا۔
وزارت خزانہ نے ہدایت کی ہے کہ پاسکو سے گندم خریدنے کے لیے پہلے ادائیگیاں کی جائیں۔ دوسری طرف صوبوں کو پاسکو سے درآمدی اور مقامی گندم 50،50 فی صد فراہم کی جائے گی، رواں سال صوبوں اور ایجنسیز نے 24 لاکھ 88 ہزار میٹرک ٹن گندم کی ڈیمانڈ کی ہے۔
پاسکو ذخائر سے 1 لاکھ 40 ہزار میٹرک ٹن گندم کے پی کے کو فراہم کی جائے گی، 2 لاکھ میٹرک ٹن گلگت بلتستان، 3 لاکھ میٹرک ٹن آزاد جموں و کشمیر کو دینے کا کوٹہ ہے، دستاویز کے مطابق پاسکو ذخائر سے 4 لاکھ میٹرک ٹن گندم یوٹیلٹی اسٹورز کو دی جائے گی۔
