ریاض: سعودی شہروں کے درمیان ٹرانسپورٹ کے سب سے بڑے منصوبے کا آغاز ہو گیا۔
تفصیلات کے مطابق سعودی پبلک ٹرانسپورٹ اتھارٹی نے کہا ہے کہ مملکت کے شہروں کے درمیان ٹرانسپورٹ کے سب سے بڑے منصوبے کا آغاز کیا جا رہا ہے، جس سے سالانہ 60 لاکھ افراد کو سفر کی سہولت فراہم ہوگی۔
اس سلسلے میں سعودی پبلک ٹرانسپورٹ کمپنی (ساپٹکو) اور نیکس کونٹینینٹل ہولڈنگ کمپنی کے درمیان بدھ کو معاہدے پر دستخط ہوئے ہیں، ساپٹکو نے مملکت کے جنوبی علاقے کے شہروں کے درمیان بس سروس کا دس سالہ رعایتی کنٹریکٹ حاصل کر لیا ہے۔
اخبار 24 کے مطابق اس منصوبے پر سال رواں 2023 کی چوتھی سہ ماہی سے عمل درآمد شروع ہوگا اور یہ دس سال کے لیے مؤثر ہوگا، ساپٹکو اس منصوبے میں 85 فی صد اور نیکس کونٹینینٹل ہولڈنگ کمپنی 15 فی صد کی حصہ دار ہوگی۔
توقيع عقود امتياز أول مشروع لخدمات نقل الركاب بــ #الحافلات بين مدن المملكة https://t.co/N03GomYj9R pic.twitter.com/3n1mTqzrNt
— أخبار 24 (@Akhbaar24) February 15, 2023
سعودی پبلک ٹرانسپورٹ اتھارٹی کے چیئرمین رمیح الرمیح نے بتایا کہ پبلک ٹرانسپورٹ کا یہ نیا نظام رواں برس ہی مختلف شہروں میں شروع کیا جا رہا ہے۔
انھوں نے بتایا کہ نئی بس سروس مملکت کے 200 شہروں کو 76 روٹس کے ذریعے جوڑے گی، اس کے تحت 35 ہزار سے زیادہ اسامیاں پیدا ہوں گی۔
رمیح الرمیح کے مطابق اس منصوبے سے قومی پیداوار میں 3.2 ارب ریال کا اضافہ ہوگا، اور سیاحوں کو سیاحتی مقامات پر آنے جانے میں سہولت ہوگی۔