ورلڈکپ میں پاکستان کرکٹ ٹیم کی کارکردگی کافی مایوس کن رہی، ایونٹ سے اخراج کے بعد قومی ٹیم وطن واپس پہنچ چکی ہے، اب پی سی بی کو مکی آرتھر کی وطن آمد کا انتظار ہے۔
آئی سی سی ورلڈ کپ 2023 میں قومی ٹیم کی کارکردگی کا پوسٹ مارٹم کرنے کے لیے پاکستان کرکٹ بورڈ ٹیم ڈائریکٹر کا منتظر ہے۔ ذرائع کا کہنا ہے کہ مکی 15 اور 16 نومبر کی درمیانی شب دبئی کے راستے لاہور آئیں گے۔
قومی ٹیم کے ڈائریکٹر مکی آرتھر پاکستان پہنچنے کے بعد مینجمنٹ کے اراکین سے بالمشافہ ملاقاتیں کریں گے، پاکستان کرکٹ بورڈ کو انتظارہے کہ ٹیم ڈائریکٹر، ہیڈ کوچ، منیجر اور کپتان کیا رپورٹ پیش کرتے ہیں۔
اطلاعات ہیں کہ چیئرمین پی سی بی مینجمنٹ کمیٹی ذکا اشرف اگلے ایک دو روز میں کرکٹرز کے ساتھ مشاورتی عمل کا بھی آغاز بھی کریں گے۔
مصروفیت کے باعث ذکا کے شہر سے باہر ہونے کی اطلاعات ہیں جس کے باعث وہ پیر کو پی سی بی ہیڈ کوارٹرز بھی نہیں آئے۔ ذرائع کے مطابق ملاقاتوں اور مشاورتی عمل کے بعد تبدیلیوں کے حوالے سے پی سی بی کا لائحہ عمل سامنے آئے گا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں