ڈیرہ اسماعیل خان: پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمان کا کہنا ہے کہ حکومت کا مستقبل روشن ہے ہم بحرانوں سے نکل آئیں گے۔
اے آر وائی نیوز کے مطابق جمعیت علما اسلام (ف) کے سربراہ مولانا فضل الرحمان نے میڈیا سے گفتگو کرتے ہوئے کہا کہ عمران خان دوسروں پر تنقید کرنے سے قبل اپنی کارکردگی عوام کو بتائیں ان کا استعفوں کی گردان لگانا صرف بلیک میل کرنا ہے۔
انہوں نے کہا کہ سیاسی عدم استحکام پیدا کرنا ان کا ایجنڈا ہے، ہم دلدل میں پھنسے ہوئے ہیں اور اس سے نکلنے کی کوشش کررہے ہیں۔
فضل الرحمان نے کہا کہ صوبائی حکومت اپنی ناکامی وفاق پر تھوپ رہی ہے انہوں نے اتنے قرضے لیے کہ ماضی میں کسی حکومت نہیں لیے۔
انہوں نے کہا کہ ہم ملکی بقا کی جنگ لڑ رہے ہیں، پاکستان کا معاشی سیاسی اور دفاعی استحکام ہماری منزل ہے، سی پیک سے ملک بہت ترقی کریگا، 26 دسمبر کو شہباز شریف سی پیک کے اگلے مرحلے کا افتتاح کریں گے۔
پی ڈی ایم سربراہ نے کہا کہ ہم تمام مکاتب فکر کے حقوق کی بات کرتے ہیں، ملک بھر سے بڑی شخصیات جے یو آئی میں شمولیت اختیار کررہی ہیں نئے لوگوں کی شمولیت سے جے یو آئی کا مستقبل روشن ہوگا۔
انہوں نے کہا کہ جے یو آئی نے انسانی خدمت کے لیے سیاست کی ہے ہماری جماعت کو آج عوامی قوت کے طور پر جانا جاتا ہے۔
