اسلام آباد میں دفعہ 144 کے نفاذ کے باوجود پی ڈی ایم سپریم کورٹ کے خلاف ریڈ زون میں احتجاج کر رہی ہے پنڈال میں اب خیمے لگانے اور واش رومز بنانے کا کام شروع کیا جا رہا ہے۔
اے آر وائی نیوز کے مطابق اسلام آباد میں دفعہ 144 کےنفاذ کے باعث پی ڈی ایم نے اپنا احتجاج ریڈ زون کے بجائے ڈی چوک پر کرنے کا فیصلہ کیا تھا جب کہ ضلعی انتظامیہ نے پی ڈی ایم کو احتجاج کی اجازت دینے سے انکار کر دیا تھا۔
دفعہ ایک سو چوالیس کے نفاذ کے باوجود پی ڈی ایم کے کارکن سپریم کورٹ کے خلاف احتجاج کے لیے ریڈ زون پہنچ گئے ہیں۔ ذرائع نے بتایا ہے کہ احتجاج کے شرکا کے لیے اب پنڈال میں خیمے لگانے اور واش رومز بنانے کا کام شروع کرنے کا فیصلہ کیا گیا ہے۔
ذرائع کا کہنا ہے کہ پی ڈی ایم مظاہرہ انتظامی کمیٹی کا اجلاس کنٹینر میں جاری ہے۔ انتظامی کمیٹی نے مظاہرے کو دھرنے میں تبدیل کرنے سے متعلق انتظامات شروع کر دیے ہیں اور سرینا چوک تک پنڈال میں اسپیکر ودیگر اہم انتظامات کرنے کی بھی ہدایت کی ہے۔
