اسلام آباد : حکمران اتحاد کی جانب سے عدالتی کارروائی کے بائیکاٹ کرنے کے اعلان کے باوجود پیپلزپارٹی، چوہدری شجاعت اورڈپٹی اسپیکرکے وکیل سپریم کورٹ پہنچ گئے۔
تفصیلات کے مطابق پی ڈی ایم نے سپریم کورٹ کے بائیکاٹ کرنے کے فیصلے سے یوٹرن لے لیا، پیپلزپارٹی،چوہدری شجاعت اورڈپٹی اسپیکرکےوکیل سپریم کورٹ پہنچ گئے۔
پی پی وکیل فاروق ایچ نائیک اور چوہدری شجاعت کےوکیل صلاح الدین اور ڈپٹی اسپیکردوست محمدمزاری کےوکیل عرفان قادر سپریم کورٹ پہنچے۔
وکیل عرفان قادر نے کہا کہ دوست محمد مزاری نے سپریم کورٹ کے تین رکنی بنچ کا بائیکاٹ نہیں کیا، میں نے بھی کبھی کسی عدالت کا بائیکاٹ نہیں کیا، آج عدالت کے سامنے اپنی بات کروں گا۔
یاد رہے گذشتہ روز سپریم کورٹ نے ڈپٹی اسپیکر رولنگ کیس میں حکومتی اتحاد کی فل کورٹ بنانے کی درخواست مسترد کردی تھی۔
بعد ازاں حکمران اتحاد نے ڈپٹی اسپیکر رولنگ کیس میں فل کورٹ نہ بنانے کے فیصلے کو مسترد کرتے ہوئے عدالتی کارروائی کے بائیکاٹ کا اعلان کرتے ہوئے دھمکیوں پر اتر آئے تھے۔
